Ronaldu Yevropaga qaytishi mumkinmi? Taxminlar kuchaymoqda
Krishtianu Ronaldu hozirda Saudiya Arabistonining "Al-Nasr" jamoasida faoliyat yuritmoqda. Bu haqda Zamin.uz xabar berdi.
U yaqinda klub bilan munosabatlarini normallashtirib, boykotdan keyin yana maydonga qaytdi. Shunga qaramay, yozgi transfer oynasida portugaliyalik futbolchining boshqa klubga o‘tishi ehtimoli mavjudligini mutaxassislar ta’kidlamoqda.
Ushbu ma’lumotni euro-football.ru sayti xabar qilgan. Ma’lum bo‘lishicha, Krishtianu Ronalduning agenti Jorje Mendesh Yevropaning yetakchi klublari bilan aloqaga chiqib, 41 yoshli futbolchini tarkibga qo‘shishni taklif qilmoqda.
Bu orqali Ronaldu yana Yevropa futboliga qaytishi mumkinligi haqida taxminlar kuchaymoqda. Avvalroq OAVda Ronalduning "Manchester Yunayted" jamoasidan ketishi sababli agenti Mendesh bilan hamkorlikni to‘xtatgani haqida xabarlar tarqalgan edi.
Biroq Transfermarkt bergan ma’lumotlarga ko‘ra, Krishtianu hali ham Mendesh agentligining mijozlari qatorida bo‘lib turibdi. Ronaldu va "Al-Nasr" o‘rtasidagi amaldagi shartnoma 2027 yilning o‘rtalarigacha mo‘ljallangan.
Bu esa futbolchining kelajagi borasida turli taxminlarga sabab bo‘lmoqda. Shu bilan birga, Yevropa klublarining qiziqishi va agentning faoliyati Krishtianuning katta sahnaga qaytishi ehtimolini oshiryapti.
