Ronaldu Yevropaga qaytishi mumkinmi? Agent izlanmoqda
Krishtianu Ronaldu Saudiya Arabistonining "Al-Nasr" klubi bilan yuzaga kelgan kelishmovchiliklardan so‘ng yana maydonga qaytdi. Bu haqda Zamin.uz xabar berdi.
Biroq, portugaliyalik futbol yulduzining yozgi transfer oynasida klubini o‘zgartirishi ehtimoli haqida gap-so‘zlar davom etmoqda. Bu haqda euro-football.ru sayti xabar berdi.
The Touchline nashrining ma’lumotiga ko‘ra, Ronalduning agenti Jorje Mendes yozgi transfer oynasi oldidan Yevropaning nufuzli klublari bilan bog‘lanib, 41 yoshli futbolchini o‘z tarkiblariga qo‘shish bo‘yicha takliflar bermoqda. Shuningdek, Mendes Ronalduni Yevropa maydonlariga qaytarish imkoniyatlarini ko‘rib chiqayotgani aytilmoqda.
Eslatib o‘tamiz, avvalroq matbuotda Ronaldu "Manchester Yunayted"ni tark etganidan so‘ng Mendes bilan hamkorlikni to‘xtatgani haqida xabarlar tarqalgan edi. Shunga qaramay, Transfermarkt ma’lumotlariga ko‘ra, Krishtianu hanuz Mendes agentligi mijozlari ro‘yxatida saqlanib qolgan.
Hozirda Ronaldu va "Al-Nasr" o‘rtasida tuzilgan amaldagi shartnoma 2027 yilning o‘rtalarigacha davom etishi belgilangan. Shu sababli, futbolchining yaqin kelajakdagi transfer imkoniyatlari futbol olamida katta qiziqish uyg‘otmoqda.
