Rossiya va Mali o‘rtoqlik uchrashuvi martda bo‘lib o‘tadi

Rossiya terma jamoasi joriy yilning mart oyida Mali milliy jamoasi bilan o‘rtoqlik uchrashuvi o‘tkazishi rejalashtirilmoqda. Bu haqda Zamin.uz xabar berdi.

Rasmiy ma’lumotlar hali e’lon qilinmagan bo‘lsa-da, Mali futbol federatsiyasi vakillari o‘yin Rossiyaning Krasnodar shahrida bo‘lib o‘tishini tasdiqlashgan. Bu haqda *euro-football.ru* xabar berdi.

Mali futbol federatsiyasi bosh kotibi Sidi Bekayening aytishicha, ular Rossiyaga qarshi bahsga eng kuchli tarkibda kelishni reja qilgan. Tarkibda Bissuma, Niakate, Sangare va Nene kabi yetakchi futbolchilar ham ishtirok etadi.

Ular 25–26 mart kunlari Krasnodarga yetib kelib, o‘yinoldi mashg‘ulotlarini o‘tkazishadi. Bekaye, shuningdek, Rossiya bilan o‘yin tashkil qilish bo‘yicha kelishuv murakkab kechmaganini ta’kidladi.

Ularning fikricha, kuchli raqib bilan o‘ynash jamoa uchun muhim tajriba bo‘ladi. Eslatib o‘tamiz, Rossiya terma jamoasi UEFA va FIFA tomonidan qo‘yilgan sanksiyalar sababli xalqaro musobaqalarda qatnasha olmayapti.

Shu bois, hozircha faqat o‘rtoqlik uchrashuvlarini o‘tkazish imkoniga ega.