Rossiya va Mali Krasnodarda o‘rtoqlik uchrashuvi o‘tkazadi

Rossiya terma jamoasi mart oyida Mali terma jamoasi bilan o‘rtoqlik uchrashuvi o‘tkazadi. Bu haqda Zamin.uz xabar berdi.

Hozircha Rossiya futbol ittifoqi bu o‘yinni rasman tasdiqlamagan bo‘lsa-da, Mali futbol federatsiyasi Krasnodarda uchrashuv bo‘lib o‘tishini bir necha bor ma’lum qilgan. Bu haqda euro-football.ru xabar berdi.

Mali futbol federatsiyasi bosh kotibi Sidi Bekaye jamoa Rossiyaga qarshi o‘yinga o‘zining eng kuchli tarkibi bilan kelishini aytgan. Uning so‘zlariga ko‘ra, Bissuma, Niakate, Sangare va Nene kabi asosiy futbolchilar jamoa tarkibida bo‘ladi.

Futbolchilar taxminan 25–26 mart kunlari Krasnodarga yetib kelib, o‘yindan oldin mashg‘ulotlar o‘tkazishadi. Sidi Bekaye, shuningdek, Rossiya bilan o‘rtoqlik uchrashuvini tashkil qilish bo‘yicha kelishuv oson kechganini ta’kidladi.

U Mali terma jamoasi kuchli raqib bilan o‘ynashdan mamnun bo‘lishini ham qo‘shimcha qildi. Ma’lumki, Rossiya terma jamoasi Yevropa futbol uyushmalari ittifoqi (UEFA) va FIFA tomonidan sanksiyalar ostida qolgani sababli hozircha faqat o‘rtoqlik uchrashuvlarida ishtirok etishi mumkin.

Shu bois, bu kabi uchrashuvlar Rossiya futboli uchun muhim ahamiyat kasb etadi.