Rossiya va Mali o‘rtasida o‘rtoqlik o‘yini bo‘lib o‘tadi

Rossiya terma jamoasi mart oyida Mali terma jamoasiga qarshi o‘rtoqlik uchrashuvi o‘tkazishi kutilmoqda. Bu haqda Zamin.uz xabar berdi.

Garchi Rossiya futbol ittifoqi (RFU) bu haqda rasmiy bayonot bermagan bo‘lsa-da, Mali futbol federatsiyasi o‘yin Krasnodarda bo‘lishini bir necha bor tasdiqlagan. Bu haqda euro-football.ru xabar bermoqda.

Mali futbol federatsiyasi bosh kotibi Sidi Bekayening ma’lum qilishicha, jamoa Rossiyaga qarshi o‘yinga eng kuchli tarkibda yo‘l oladi. Unga ko‘ra, jamoaning asosiy futbolchilari, jumladan, Bissuma, Niakate, Sangare va Nene Krasnodarga taxminan 25–26 mart kunlari yetib keladi va o‘yinoldi mashg‘ulotlarini o‘tkazadi.

Sidi Bekaye o‘rtoqlik uchrashuvini tashkil etish bo‘yicha kelishuv juda oson kechganini ham ta’kidladi. U Mali jamoasi kuchli raqib bilan bahs olib borishdan mamnun ekanini qayd etdi.

Shuni ham eslatib o‘tish kerakki, Rossiya terma jamoasi UEFA va FIFA sanksiyalari tufayli xalqaro musobaqalarda ishtirok eta olmayapti. Shu sababli hozircha faqat o‘rtoqlik uchrashuvlarida qatnashmoqda.