«Benfika» futbolchisi irqchilikda ayblanmoqda

Chempionlar ligasidagi «Benfika» va «Real» (0:1) o‘yinidan so‘ng yuzaga kelgan mojaro futbol jamoatchiligi orasida katta muhokamalarga sabab bo‘ldi. Bu haqda Zamin.uz xabar berdi.

Bahsning markazida «Benfika» yarimhimoyachisi Janluka Prestianni va «Real» futbolchisi Vinisius Junior o‘rtasidagi ziddiyat turibdi. Ushbu holat natijasida Prestiannini 10 o‘yinlik diskvalifikatsiya xavfi kutmoqda.

Voqea 50-daqiqada boshlangan. Vinisius gol urib, burchak bayroqchasi yonida raqsga tushgan.

Bu harakatdan keyin futbolchilar o‘rtasida tortishuv kelib chiqqan va Vinisius sariq kartochka olgan. Asosiy mojaro esa keyinroq yuz bergan: Vinisius hakamga Prestianni uni «maymun» deb haqorat qilganini bildirgan.

Mazkur da’voni «Real» futbolchisi Kilian Mbappe ham tasdiqlagan. Vaziyat shu darajada jiddiylashdiki, o‘yin irqchilikka qarshi kurash protokoli asosida vaqtincha to‘xtatildi.

Agar UYEFAning etika va intizom bo‘yicha inspektorlari Prestiannining irqchilik qilganini tasdiqlovchi dalillarni aniqlasa, unga 10 o‘yinlik chetlatish jazosi qo‘llanilishi mumkin. Bu jazo 2013 yilda, Janni Infantino UYEFA bosh kotibi bo‘lgan davrda joriy etilgan.

Bunday holatlar avval ham kuzatilgan. Masalan, 2021 yilda Yevropa ligasi doirasidagi «Slaviya» va «Reynjers» o‘yinida chex futbolchisi Ondrey Kudela raqibi Glen Kamarani irqiy haqorat qilgani uchun diskvalifikatsiya qilingan edi.

UYEFA bunday masalalarda qat’iy qarorlar qabul qilib kelmoqda. Hozirda barcha narsa tekshiruv natijalariga bog‘liq.

Bu voqea oddiy maydon mojarosidan ko‘ra jiddiyroq ahamiyatga ega, chunki irqchilikka nisbatan toqatsizlik tamoyili futbolning asosiy qadriyatlaridan biridir. Bu ish adolatning qaror topishi uchun sinchkovlik bilan ko‘rib chiqilishi kerak.

Manba: one.uz