Rossiya va Mali Krasnodarda o‘rtoqlik o‘yini o‘tkazadi
Rossiya terma jamoasi mart oyida Mali terma jamoasi bilan o‘rtoqlik uchrashuvi o‘tkazishi rejalashtirilmoqda. Bu haqda Zamin.uz xabar berdi.
Ushbu o‘yin Rossiyaning Krasnodar shahrida bo‘lib o‘tishi kutilmoqda. Garchi Rossiya Futbol Ittifoqi bu haqida hali rasmiy xabar bermagan bo‘lsa-da, Mali tomoni o‘yin joyini bir necha bor tasdiqlagan.
Bu haqda euro-football.ru sayti xabar bermoqda. Mali futbol federatsiyasi bosh kotibi Sidi Bekaye o‘z bayonotida jamoa Rossiyaga to‘liq tarkibda borishini ma’lum qildi.
Unga ko‘ra, jamoaning asosiy futbolchilari, jumladan, Bissuma, Niakate, Sangare va Nene ham Krasnodarga safar qiladi. Ular taxminan 25–26 mart kunlari yetib kelib, o‘yinoldi mashg‘ulotlarini o‘tkazishlari rejalashtirilgan.
Bekayening so‘zlariga ko‘ra, Rossiya bilan o‘yin tashkil qilish bo‘yicha kelishuvga erishish jarayoni og‘ir kechmagan. U shuningdek, Mali jamoasi kuchli raqibga qarshi maydonga tushish imkoniyatidan mamnun ekanini ta’kidladi.
Ma’lumot uchun, Rossiya terma jamoasi hozirda Yevropa futbol ittifoqi va FIFA tomonidan joriy etilgan sanksiyalar sababli xalqaro musobaqalarda qatnasha olmayapti. Shu bois, jamoa faqat o‘rtoqlik uchrashuvlarini o‘tkazish imkoniga ega.
