Dibala: Messi va Ronaldu maydondagi haqiqiy yirtqichlar
Paulo Dibala futbol faoliyati davomida dunyoning ikki mashhur futbolchisi — Lionel Messi va Krishtianu Ronaldu bilan bir jamoada to‘p surish baxtiga muyassar bo‘lgan. Bu haqda Zamin.uz xabar berdi.
Hozirda «Roma» klubi sharafini himoya qilayotgan hujumchi bu ikki futbolchi haqida o‘z fikrlarini bildirdi. Dibala futbol olamida doimiy bahsga sabab bo‘lib kelayotgan savol — qaysi biri kuchliroq —ga aniq javob bermaslikni ma’qul ko‘rdi.
Ushbu ma’lumotni euro-football.ru sayti xabar qilgan. Dibalaning so‘zlariga ko‘ra, Messi va Ronaldu texnik jihatdan bir-biridan farq qiladi, ammo ular mentalitet borasida juda o‘xshash.
Ularning ikkisida ham g‘alabaga bo‘lgan cheksiz ishtiyoq mavjud. Dibala ularni maydondagi «haqiqiy yirtqich» deb atadi.
Ularning kuchli tomonlari turlicha bo‘lsa-da, ikkalasi ham o‘z mahorati bilan boshqalardan ajralib turadi. Bu fikrlarni La Gazzetta dello Sport nashri keltirgan.
Ma’lumotlarga ko‘ra, Lionel Messi faoliyati davomida 8 marta «Oltin to‘p» sovrinini qo‘lga kiritgan bo‘lsa, Krishtianu Ronaldu bu mukofotga 5 bor sazovor bo‘lgan. Hozir Messi AQShning «Inter Mayami» klubida o‘ynayotgan bo‘lsa, Ronaldu Saudiya Arabistonining «Al-Nasr» jamoasi safida to‘p surmoqda.
