Vinisius Junior va Prestianni o‘rtasidagi mojaro o‘rganilmoqda

UEFA Chempionlar ligasining «Benfika» va «Real» jamoalari o‘rtasidagi uchrashuvda yuzaga kelgan mojaro tashkilot tomonidan o‘rganilmoqda. Bu haqda Zamin.uz xabar berdi.

«Real» jamoasi futbolchisi Vinisius Junior raqib jamoa futbolchisi Janluka Prestiannini irqchilik mazmunidagi haqorat ishlatishda aybladi. Bu haqda euro-football.ru xabar berdi.

ESPN ma’lumotiga ko‘ra, Prestianni UEFAga ko‘rsatma bergan va unga qo‘yilgan ayblovlarni rad etgan. «Benfika» futbolchisining so‘zlariga ko‘ra, u ispan tilida irqchilik mazmunida talqin qilinadigan «mono» (maymun) so‘zini ishlatmaganini ta’kidlagan.

U bu so‘z o‘rniga boshqa bir jarangdosh so‘z aytganini aytmoqda. Ushbu so‘z haqoratli bo‘lishiga qaramay, irqchilik mazmuniga ega emas, balki u an’anaviy bo‘lmagan jinsiy orientatsiyadagi kishilarga nisbatan qo‘llanadigan atama ekan.

Mojaro davomida Prestianni og‘zini futbolka bilan yopib olgani sababli uning lab harakatlarini o‘qish deyarli imkonsiz bo‘lib qolgan. Shu sababli mutaxassislar bu borada aniq xulosa chiqara olmayapti.

Mazkur uchrashuv yakunida «Real» jamoasi «Benfika»ni 1:0 hisobida mag‘lub etdi.