Arteta: Bosimni boshqarish chempionlikning kaliti
Londonning "Arsenal" futbol klubi bosh murabbiyi Mikel Arteta jamoasi atrofidagi tanqidlar, bosim va salbiy muhit haqida o‘z fikrlarini bildirdi. Bu haqda Zamin.uz xabar berdi.
Unga shogirdlarini turli gap-so‘zlardan qanday himoya qilish mumkinligi so‘ralganda, murabbiy bu kabi holatlarni normal deb qabul qilish kerakligini ta’kidladi. Arteta fikricha, Angliya Premer-ligasida bunday shovqin va bosim futbolning ajralmas bir qismi hisoblanadi.
Murabbiyning so‘zlariga ko‘ra, bunday muhitda eng muhim savol shuki: futbolchi bosim ostida ishlashni istaydimi yoki yo‘qmi? Agar bunga tayyor bo‘lmasa, katta sahnada o‘ynash unga mos emas.
Arteta jamoasiga ham, muxlislariga ham tashqi gap-so‘zlarga emas, ichki tartib va intizomga e’tibor qaratishni maslahat berdi. Unga ko‘ra, katta o‘yinlarda katta mas’uliyat va bosim bo‘lishi tabiiy.
Hozirgi paytda Angliya Premer-ligasida chempionlik poygasi qizg‘in pallaga kirgan. "Arsenal" turnir jadvalida peshqadamlik qilayotgani bois, har bir o‘yin muhim ahamiyatga ega.
Ayniqsa, bugun, 22-fevral kuni "Tottenhem"ga qarshi safar uchrashuvi oldidan jamoa yanada ko‘proq e’tibor talab etmoqda. Arteta shogirdlari uchun bunday derbilar nafaqat futbol, balki ruhiy tayyorgarlikni ham sinovdan o‘tkazadi.
Bunday o‘yinlarda murabbiy futbolchilarga bosimdan qochishni emas, aksincha, uni to‘g‘ri boshqarishni o‘rgatmoqda. Artetaning bu fikrlari shuni ko‘rsatadiki, "Arsenal" jamoasi chempionlikka erishish uchun nafaqat maydondagi raqiblar bilan kurashmoqda, balki ichki ikkilanish va tashqi bosimlarni yengishga ham intilmoqda.
Murabbiy shovqindan qochish emas, balki unga to‘g‘ri munosabatda bo‘lishni tanlamoqda. Uningcha, maydonda ishni to‘g‘ri bajarish kifoya, qolganini natijalar o‘zlari ko‘rsatadi.
