O‘zbekiston U-17 jamoasi Qozog‘istonni mag‘lub etdi
O‘zbekistonning 17 yoshgacha bo‘lgan futbolchilar jamoasi U-17 Rivojlanish kubogi doirasida Qozog‘iston jamoasiga qarshi kechgan uchrashuvda g‘alaba qozonib, musobaqani uchinchi o‘rin bilan yakunladi. Bu haqda Zamin.uz xabar berdi.
Ushbu bahs haqiqiy dramatik voqealarga boy bo‘ldi. Sergey Chigodayev boshchiligidagi jamoa 3:2 hisobida yutib, bronza medaliga sazovor bo‘ldi.
Uchrashuvning birinchi bo‘limida Qozog‘iston jamoasi ustunlikni qo‘lga kiritdi. 23-daqiqada Rasul Akimovning goli hisobni 1:0 ko‘rinishga keltirdi.
42-daqiqada esa Meiram Baltabayev o‘z jamoasining ikkinchi golini kiritib, tanaffusga 2:0 hisobidagi ustunlik bilan chiqishdi. Ikkinchi bo‘limda o‘yin keskin o‘zgarishlarga boy bo‘ldi.
54-daqiqada Qozog‘iston futbolchisi Meiram Baltabayev avtogol urib, hisob 2:1 ko‘rinishini oldi. Ushbu vaziyatdan so‘ng, har ikki jamoa g‘alaba uchun bor kuchini ishga soldi.
Maydondagi kurash va ehtiros yanada oshdi. Hal qiluvchi daqiqalar o‘yinning oxirida kuzatildi.
79-daqiqada O‘zbekiston futbolchisi Suhrob Sadirjonov hisobni tenglashtirdi — 2:2. Oradan bir daqiqa o‘tib, Mironshoh Eshpo‘latovning goli jamoamizga g‘alaba keltirdi — 3:2.
Shu tariqa, O‘zbekiston U-17 jamoasi uchinchi o‘rinni qo‘lga kiritdi. Musobaqaning yakuniy natijasi yosh futbolchilarimizning kuchli xarakterini va kurashuvchanligini yana bir bor namoyon etdi.
Ayniqsa, so‘nggi daqiqalarda kiritilgan ikki gol o‘yinning tugashiga qadar hech narsa aniq emasligini isbotladi. Ushbu g‘alaba yoshlarimizga katta ruhiy dalda bergani shubhasiz.
Manba: Zamin.uz
