Mourinyu matbuotdan chetda, "Benfika" qiyin ahvolda

Lissabonning "Benfika" klubi bosh murabbiyi Joze Mourinyu Chempionlar ligasi doirasida "Real Madrid"ga qarshi javob uchrashuvi oldidan jurnalistlar bilan uchrashuvga chiqishni rad etdi. Bu haqda Zamin.uz xabar berdi.

Portugaliya matbuoti bu holatni "yana bir sukut" sifatida baholamoqda. Ma’lum bo‘lishicha, Mourinyu joriy mavsumda matbuot anjumanlarini o‘tkazib yuborgan holatlar soni 10 taga yetgan.

Klub matbuot xizmatining ma’lum qilishicha, bu safar jurnalistlar savollariga Mourinyuning yordamchisi Joau Tralyau javob beradi. "Benfika" uchun vaziyat o‘ta murakkab.

Birinchi o‘yinda portugaliyaliklar 0:1 hisobida mag‘lub bo‘lishgan va Mourinyu hakam bilan bahslashgani uchun qizil kartochka olib, javob bahsida zaxira o‘rindig‘ida bo‘lish imkoniyatidan mahrum bo‘lgan. Shunday qilib, murabbiy jamoani maydondan boshqarish huquqiga ega emas.

Bundan tashqari, "Benfika"ning hujum chizig‘i ham zarba olgan. UYEFA Vinisius Junior bilan bog‘liq mojaro sababli jamoa hujumchisi Djanluka Prestiannini javob o‘yinida ishtirok etishdan chetlatdi.

Bu qaror jamoaning hujumdagi imkoniyatlarini sezilarli darajada kamaytirishi mumkin. Endilikda asosiy savol shuki, Mourinyuning sukuti va maydon chetida yo‘qligi, shuningdek, Prestiannisiz qolgan "Benfika" Madridda qanday natijaga erishadi?

Chorshanba kuni "Santyago Bernabeu" stadionida haqiqiy kurash kutilmoqda. Ushbu bahsda har bir detal, hatto matbuot anjumaniga chiqmaslik ham, psixologik muhitga ta’sir o‘tkazishi mumkin.

Manba: one.uz