FIFA vaqt cho‘zishga qarshi yangi qoidani taklif qildi
FIFA futbolda vaqtni ataylab cho‘zish va o‘yin sur’atini pasaytirishga qarshi yangi tartibni joriy qilishni taklif qildi. Bu haqda Zamin.uz xabar berdi.
Unga ko‘ra, jarohat olgan futbolchilar maydonda tibbiy yordam olgach, o‘yinga qaytishdan oldin kamida bir daqiqa kutishi lozim bo‘ladi. Bu taklif Xalqaro futbol assotsiatsiyalari kengashi (IFAB)ning yillik yig‘ilishida muhokama qilinadi.
Agar tasdiqlansa, qoida xalqaro futbol qonunlariga kiritiladi. Tartibning asosiy maqsadi o‘yinda vaqtni sun’iy cho‘zishga qarshi chora ko‘rishdir.
FIFA avvalroq ikki daqiqalik kutish tartibini sinovdan o‘tkazgan, ammo bu jiddiy tanqidga uchragan edi. Ikki daqiqa davomida jamoa bir o‘yinchidan mahrum bo‘lishi, ayniqsa muhim lahzalarda, jiddiy xavf tug‘dirishi mumkinligi ta’kidlangan.
Shuning uchun bir daqiqalik variant qabul qilindi. Yangi qoida barcha holatlarga tatbiq etilmaydi.
Agar futbolchining jarohati raqibning qo‘pol harakati sabab yuzaga kelgan bo‘lsa yoki jarohat olgan o‘yinchi darvozabon bo‘lsa, shuningdek, penalti tepishi kerak bo‘lgan futbolchi yordamga muhtoj bo‘lsa, bunday futbolchilar maydondan chiqmaydi. Biroq bu tartib muayyan xavotirlarni ham keltirib chiqarmoqda.
Ba’zi mutaxassislar haqiqatan jarohat olgan futbolchilar ham noto‘g‘ri jazolanishi mumkinligini ta’kidlashmoqda. Shunga qaramay, yangi qoida sun’iy vaqt cho‘zishga qarshi samarali choraga aylanishi kutilmoqda.
Chunki bu orqali o‘yin davomida vaqtni ataylab o‘tkazishning narxi oshadi. Agar IFAB bu taklifni tasdiqlasa, futbol qoidalarida sezilarli o‘zgarish yuz beradi.
Endilikda maydonda tibbiy yordam faqat jarohatni davolash emas, balki taktik qarorlarni ham o‘zgartiradigan omilga aylanishi mumkin. Manba: one.uz
