«Strasbur» – «Lion» o‘yinida tartibsizlik yuz berdi
Fransiya chempionati doirasidagi 23-tur o‘yinida «Strasbur» jamoasi o‘z maydonida «Lion»ni 3:1 hisobida mag‘lub etdi. Bu haqda Zamin.uz xabar berdi.
Ushbu uchrashuv davomida «Stad de la Meno» stadionida tartibsizliklar yuzaga keldi. Bu haqda euro-football.ru xabar bermoqda.
Ma’lum bo‘lishicha, mojaroga tribunada o‘ng radikal mazmundagi shiorlar yozilgan bannerlarning paydo bo‘lishi sabab bo‘lgan. Ushbu bannerlarni bir guruh shaxslar, jumladan, ilgari Fransiya hukumati tomonidan tarqatib yuborilgan Offenders tashkilotining sobiq a’zolari yoygani aytilmoqda.
O‘zlarini «mustaqil» deb atagan bu shaxslarning harakati stadionda keskinlikka olib kelgan. Stadion xavfsizlik xodimlari bannerlarni tezda olib tashlashga harakat qilgan bo‘lsa-da, vaziyat yanada chigallashgan.
UB90 nomli muxlislar guruhi bu kabi mazmundagi bannerlarning paydo bo‘lishiga qarshi chiqib, tartibsizlikni keltirib chiqargan shaxslar bilan to‘qnashgan. Hozirgi vaqtda stadion kuzatuv kameralaridan olingan yozuvlar huquq-tartibot idoralariga topshirilgan.
Mazkur holat yuzasidan tergov ishlari olib borilmoqda. Dastlabki ma’lumotlarga ko‘ra, hodisa natijasida hech kim jabrlanmagan.
