Neymar Braziliya terma jamoasi yig‘inidan chetda qoldi

Braziliya milliy futbol jamoasi bosh murabbiyi Karlo Anchelotti Neymar bo‘yicha muhim qarorga keldi. Bu haqda Zamin.uz xabar berdi.

ESPN Braziliya bo‘limining xabar berishicha, mutaxassis "Santos" hujumchisini mart oyida bo‘lib o‘tadigan yig‘inga chaqirmaslikka qaror qilgan. Bu haqda euro-football.ru sayti ma’lumot berdi.

Mazkur qaror Neymarning joriy yil yozida bo‘lib o‘tadigan Jahon chempionatida qatnashish imkoniyatini sezilarli darajada kamaytirib yuborishi mumkin. Qayd etilishicha, Braziliya terma jamoasi keyingi yig‘inni to‘g‘ridan-to‘g‘ri mundial oldidan o‘tkazadi.

Avvalroq, ommaviy axborot vositalarida 34 yoshli Neymar Jahon chempionatida ishtirok etishni o‘zining asosiy maqsadi sifatida ko‘rayotgani haqida ko‘plab xabarlar tarqalgan edi. U mazkur musobaqada qatnashishni eng katta motivatsiyasi deb bilishini bir necha bor ta’kidlagan.

Mart oyida Braziliya terma jamoasi Fransiya va Xorvatiya terma jamoalariga qarshi o‘rtoqlik uchrashuvlarini o‘tkazishi rejalashtirilgan. Neymar esa ushbu o‘yinlarda jamoaga qo‘shilmaydi.

Shu sababli uning Jahon chempionatiga borish ehtimoli yanada mavhumlashmoqda.