Futbolchilar maydonda chayqaning hayotini saqlab qoldi
Turkiyada futbol uchrashuvi vaqtida g‘aroyib voqea yuz berdi. Bu haqda Zamin.uz xabar berdi.
Ijtimoiy tarmoqlarda «Mevlanakapy Guzelhisar» va «Istanbul Yurdum Spor» jamoalari o‘rtasidagi o‘yin davomida sodir bo‘lgan hodisani aks ettirgan video keng tarqaldi. O‘yinning bir lahzasida darvozabon to‘pni uzoqlashtirishga uringanida, to‘p maydon ustidan uchib o‘tgan chayqaga tegib ketadi.
Bu haqda euro-football.ru xabar berdi. Qush yerga qulagach, har ikki jamoa futbolchilari darhol uning yoniga yugurib bordi.
«Istanbul Yurdum Spor» jamoasi sardori Gani Chatan vaziyatni tezda baholab, chayqaga birinchi yordam ko‘rsatishni boshladi. U qushga yurakni bilvosita massaj qilish orqali hayotini saqlab qolishga harakat qildi.
Shundan so‘ng, qush maydon chetidagi tibbiyot xodimlariga topshirildi. Turkiyaning AA axborot agentligi ma’lumotiga ko‘ra, chayqaning hayoti saqlab qolingan.
Qush bir muddat ucha olmasligi mumkin, ammo veterinariya xizmatlariga topshirilgach, uning sog‘ayishi kutilmoqda. Ushbu hodisa futbolchilar va tibbiyot xodimlarining mehribonligi tufayli ijobiy yakun topdi.
