Georgiy Jikiya "Fenerbahche"ga qarshi o‘yinda maydonga tushadi
"Antalyaspor" futbol klubi himoyachisi Georgiy Jikiyaning so‘nggi o‘yinlarda maydonga tushmagani jarohat bilan bog‘liq ekani ma’lum qilindi. Bu haqda Zamin.uz xabar berdi.
Bu haqda futbolchining Turkiyadagi vakili Malik Arutyunov euro-football.ru saytiga bergan ma’lumotida aytib o‘tdi. Agentning so‘zlariga ko‘ra, Jikiya hozirda jarohatdan to‘liq tiklangan va jamoaning yangi bosh murabbiyi unga ishonch bildirmoqda.
Arutyunovning ta’kidlashicha, Jikiya yaqinlashib kelayotgan "Fenerbahche"ga qarshi uchrashuvda asosiy tarkibda maydonga tushishi kutilmoqda. Shuningdek, u klubda hozirgacha uchta murabbiy faoliyat yuritganini, har birining futbolga bo‘lgan qarashlari farq qilganini qayd etdi.
2025/2026 yilgi mavsumda Jikiya Turkiya chempionati va Kubogi doirasida jami 13 ta uchrashuvda ishtirok etib, 2 ta gol urishga muvaffaq bo‘lgan. Bu natijalar futbolchining jamoa uchun muhim o‘yinchi ekanligini yana bir bor tasdiqlaydi.
