Infantino: Og‘zini berkitgan futbolchilarga qizil kartochka berilsin

FIFA prezidenti Janni Infantino futbol maydonida raqibiga nimadir deganda og‘zini bekitadigan futbolchilarga qat’iy chora ko‘rish kerakligini ta’kidladi. Bu haqda Zamin.uz xabar berdi.

Unga ko‘ra, bunday holatlar qizil kartochka bilan jazolanishi lozim. Bu haqda euro-football.ru sayti xabar berdi.

Yevropa Chempionlar ligasining so‘nggi uchrashuvlaridan birida «Benfika» jamoasi o‘yinchisi Janluka Prestiani «Real» futbolchisi Vinisius Junior bilan gaplashayotganda og‘zini futbolkasi bilan yopib olgan. Shundan so‘ng, braziliyalik futbolchi hakamga raqib tomonidan irqchilik haqoratlari aytilgani haqida shikoyat qildi.

Infantino bu masalada futbolchining og‘zini berkitib gapirishi va keyinchalik irqchilikda ayblanishi holatida qizil kartochka bilan jazolanishi kerakligini aytdi. U bu yerda muammo haqorat bo‘lgan-bo‘lmagani emas, balki oddiy mantiqda ekanini ta’kidladi: agar haqoratli gap bo‘lmasa, nega og‘izni berkitish kerak.

Uchrashuv natijasiga ko‘ra, «Real» jamoasi «Benfika»ni umumiy hisobda 3:1 hisobida mag‘lubiyatga uchratib, keyingi bosqichga yo‘l oldi.