Abduqodir Husanov tug‘ilgan kunini 1-martda nishonladi
29-fevralda tug‘ilgan Abduqodir Husanov bu yil tug‘ilgan kunini 1-martda nishonladi. Bu haqda Zamin.uz xabar berdi.
Garchi asl bayram sanasi o‘tib ketgan bo‘lsa-da, unga yo‘llangan tabriklar to‘xtamadi. "Shaharliklar" jamoasidagi yulduzlar, Erling Xoland va Rodri Ernandes, Abduqodirni rasmiy ravishda tabriklashdi.
Shundan so‘ng, unga bo‘lgan e’tibor san’at olamiga ham ko‘chdi. Janubiy Koreyaning taniqli modeli va blogeri, Pak Xi Jon, Abduqodirga atalgan maxsus post bilan ko‘pchilikning diqqatini tortdi.
Model Instagram sahifasida Husanovning libosida tushgan suratlarini e’lon qildi, ular orasida sun’iy intellekt yordamida yaratilgan qo‘shma kadr ham bor edi. Pak Xi Jon o‘z dil izhorlarida: “Tavallud ayyomingiz muborak, O‘zbekiston terma jamoasi himoyachisi Husanov!
Sizni Manchesterda ko‘rishni intizorlik bilan kutaman va shaxsan uchrashib, dastxat olishdan umidvorman”, deb yozdi. Abduqodir Husanovning futboldagi faoliyati havas qilsa arzigulik.
U "Bunyodkor" akademiyasidan chiqqan va Belarusning "Energetik-BGU" klubi orqali Yevropaga yo‘l oldi. Fransiyaning "Lans" jamoasidagi muvaffaqiyatli o‘yinlaridan so‘ng, 2025 yilning 20 yanvarida "Manchester Siti" uni 40 million yevro evaziga sotib oldi.
Pak Xi Jon esa koreyscha “Oljon” uslubidagi fotosessiyalari bilan mashhur bo‘lib, ijtimoiy tarmoqlarda 50 mingga yaqin muxlisga ega. Abduqodir Husanovning "Manchester Siti"dagi muvaffaqiyatlari o‘zbek futbolining dunyodagi nufuzini oshirishga xizmat qilishi mumkin.
Manba: One.uz.
