Marokash terma jamoasiga yangi bosh murabbiy tayinlandi
Jahon chempionatiga sanoqli oylar qolgan bir paytda Marokash futbolida muhim o‘zgarishlar ro‘y berdi. Bu haqda Zamin.uz xabar berdi.
Mamlakat qirollik futbol federatsiyasi terma jamoa bosh murabbiyi Volid Rikrokiyning iste’fosini qabul qildi. Rikrokiy boshchiligida jamoa 2022 yilgi mundialda yarim finalgacha yetib borgandi va 2025 yilgi Afrika kubogida finalda ishtirok etgan edi.
Bosh murabbiy lavozimiga Muhammad Uahbi tayinlandi. 49 yoshli mutaxassis shu paytgacha Marokashning yoshlar jamoalarida samarali faoliyat olib borgan.
Ayniqsa, uning boshqaruvida U-20 terma jamoasi 2025 yilda jahon chempioni bo‘lishga muvaffaq bo‘lgan. Uahbi 2022 yildan buyon mamlakatning U-20 va U-23 jamoalarini boshqarib kelayotgan tajribali murabbiylardan biridir.
2026 yilgi jahon chempionatida Marokash terma jamoasi Braziliya, Gaiti va Shotlandiya kabi kuchli raqiblar bilan bir guruhdan joy olgan. Yangi murabbiy oldiga qo‘yilgan asosiy vazifa jamoani qisqa vaqt ichida mundialga tayyorlash va guruh bosqichidan muvaffaqiyatli o‘tishdir.
Manba: One.uz.
