Rodri "Manchester Siti"ni tark etishi mumkin
Joriy yilning eng yaxshi futbolchisi deb e’tirof etilgan va "Oltin to‘p" sovrinini qo‘lga kiritgan Rodri, faoliyatini boshqa klubda davom ettirishi mumkinligi haqida xabarlar tarqaldi. Bu haqda Zamin.uz xabar berdi.
"Manchester Siti" rahbariyati ispaniyalik yarim himoyachini yozgi transferlar davrida sotishga tayyor ekanligini bildirdi. Klub, futbolchi bilan tuzilgan shartnoma 2027 yil yozida tugashini hisobga olib, uni 50 million yevro evaziga qo‘yib yuborishga qaror qilgan.
Rodriga uzoq vaqtdan buyon "Real Madrid" jiddiy qiziqish bildirmoqda. Futbolchi o‘z intervyularida "Qirollik klubi" safida o‘ynash uning bolalikdagi orzusi ekanligini yashirmagan.
Shunga qaramay, Madrid klubi rahbariyati shoshilinch qaror qabul qilmayapti. Ular avvalo futbolchining jismoniy holatini va jahon chempionatidagi o‘yinlarini diqqat bilan kuzatib, tahlil qilishni rejalashtirgan.
Rodri 2019 yilda "Atletiko"dan 70 million yevro evaziga "Manchester Siti" tarkibiga qo‘shilgan edi. Hozirgi kunda Transfermarkt portali futbolchining bozor qiymatini 75 million yevro deb baholamoqda.
Agar transfer amalga oshsa, bu yozgi mavsumning eng shov-shuvli o‘tishlaridan biriga aylanishi aniq.
