"Dinamo" "Bunyodkor"ni mag'lub etib, uch ochko oldi
O‘zbekiston Superligasining 2-turida Toshkentning "Bunyodkor" stadioni mezbonlik qilgan uchrashuvda "Bunyodkor" jamoasi Samarqandning "Dinamo" klubini qabul qildi. Bu haqda Zamin.uz xabar berdi.
Qiziqarli va murosasiz kechgan o‘yinda "Dinamo" 2:1 hisobida g‘alaba qozonib, uch ochkoni qo‘lga kiritdi. Uchrashuvning ilk daqiqalaridan tashabbusni o‘z qo‘liga olgan Samarqand jamoasi tezkor gollar bilan hisobni ochishga muvaffaq bo‘ldi.
7-daqiqada Azizbek Amonovning goli bilan hisob ochildi va oradan 8 daqiqa o‘tib, Firdavs Abdurahmonov ikkinchi golni kiritdi. Birinchi bo‘limda "Bunyodkor" futbolchilari vaziyatni o‘nglashga harakat qilishsa-da, "Dinamo" himoyachilari ishonchli o‘yin ko‘rsatdi.
Ikkinchi bo‘limda "Bunyodkor" murabbiyi o‘yinni kuchaytirish maqsadida bir qator o‘zgarishlar qildi. 83-daqiqada Samandar Mavlonqulov bitta gol urib, hisobni qisqartirdi.
Ammo qolgan daqiqalarda "Bunyodkor" muvozanatni tiklay olmadi va yakunda "Dinamo" qiyin g‘alabani rasmiylashtirdi. Ushbu g‘alaba "Dinamo" jamoasiga turnir jadvalida o‘z mavqeini mustahkamlash imkonini berdi.
"Bunyodkor" esa navbatdagi turda o‘z xatolarini tahlil qilib, keyingi uchrashuvlarga tayyorgarlik ko‘rishiga to‘g‘ri keladi. Manba: One.uz.
