Abduqodir Husanov "Lans"ga qaytishi mumkin

O‘zbekiston milliy terma jamoasi a’zosi Abduqodir Husanov so‘nggi paytlarda Yevropada o‘ynayotgan eng istiqbolli himoyachilardan biri sifatida e’tirof etilmoqda. Bu haqda Zamin.uz xabar berdi.

22 yoshli futbolchi transfer oynasi yaqinlashgani sari turli klublarning diqqat markazida. Ayrim klublar uning iqtidoriga ishonishsa, boshqalar uni jismoniy kuchli, zamonaviy o‘yin uslubiga ega himoyachi sifatida ko‘rishmoqda.

Fransiyaning nufuzli sayti butfootballclub.fr ma’lumotiga ko‘ra, yaqinlashayotgan yozgi transfer oynasi “Lans” klubida katta o‘zgarishlarga sabab bo‘lishi mumkin. Bu o‘zgarishlar markaziy himoyachi Samson Bayduga Yevropaning yirik klublari tomonidan qiziqish bildirilayotganligi bilan bog‘liq.

Shu vaziyat Abduqodir Husanovning “Lans”ga qaytishi uchun imkoniyat yaratishi mumkin. Jurnalist Ekrem Konurning xabariga ko‘ra, Samson Baydu uchun kurashda “Manchester Siti” oldinga chiqmoqda.

Xabarlarga ko‘ra, inglizlar futbolchini yozda sotib olib, uni yana bir mavsum “Lans”da ijarada qoldirish niyatida. Baydu 21 yoshda bo‘lib, liganing eng istiqbolli markaziy himoyachilaridan biri sifatida tanilgan.

Yakkakurashlarda qat’iyatli, paslarda aniq va o‘yinni yaxshi “o‘qiydigan” sifatlari unga bo‘lgan talabni oshirmoqda. “Liverpul”, “Borussiya Dortmund” va “Inter” kabi klublar ham Bayduni olish niyatida ekanligi ma’lum.

“Lans” o‘z himoyachisi uchun 45–55 million yevro narx belgilashi mumkin. Bu yosh va potensialga ega himoyachi uchun real summa deb baholanyapti.

“Lans”ni tark etganidan keyin Abduqodir Husanov “Manchester Siti” safida har doim boshlang‘ich tarkibda maydonga tushmayapti. Superkuchli raqobat va har pozitsiyada yuqori saviyali o‘yinchilar mavjudligi sababli, “Siti” o‘zbek himoyachisini ijaraga berish variantini ko‘rib chiqishi mumkin.

Ijarada muntazam o‘yin amaliyoti himoyachi uchun muhim. “Lans” Baydu ketishi fonida Husanovni qaytarishga urinishi mumkin.

O‘zbek legionerining maoshining bir qismini ingliz klubi qoplash ehtimoli ham bor. Bu reja “Lans” uchun ikki tomonlama foyda keltirishi mumkin.