Fabio Kannavaro Turkiyada o‘zbek futbolchilarini kuzatdi
O‘zbekiston milliy terma jamoasi bosh murabbiyi Fabio Kannavaro ayni kunlarda Turkiyada bo‘lib turibdi. Bu haqda Zamin.uz xabar berdi.
Italiyalik mutaxassis Turkiya Superligasining 25-turida bo‘lib o‘tgan "Istanbul Bashakshexir" va "Gyoztepe" uchrashuvini stadiondan bevosita kuzatdi. Bu o‘yin o‘zbek muxlislari uchun ham alohida qiziqish uyg‘otdi, chunki "Bashakshexir" tarkibida O‘zbekiston terma jamoasining ikki futbolchisi - Eldor Shomurodov va Abbos Fayzullayev asosiy tarkibda maydonga tushdi.
Kannavaro ularning o‘yinini jonli ravishda kuzatib, ularning formasi, tayyorgarligi va maydondagi rolini baholash imkoniyatiga ega bo‘ldi. Fabio Kannavaroning Turkiyaga safari faqatgina futbol uchrashuvini tomosha qilish bilan cheklanib qolmadi.
Ma’lum bo‘lishicha, u klub prezidenti Gyoksel Gyumyushdag, Mustafa Eryog‘ut, Turkiya milliy terma jamoasi bosh murabbiyi Vinchenso Montella va Selchuk Shahin bilan ham uchrashuvlar o‘tkazdi. Istanbulliklar klubi tarqatgan xabarga ko‘ra, uchrashuvlar juda iliq va samimiy muhitda o‘tgan.
Kannavaroning Istanbulga tashrifi ikki maqsadga xizmat qildi: birinchidan, terma jamoamizning legionerlarini joyida baholash; ikkinchidan, turk futboli va murabbiylar doirasi bilan aloqalarni mustahkamlash. Bu kelajakda ham terma jamoamiz, ham legionerlarimiz uchun foydali bo‘lishi mumkin bo‘lgan "to‘g‘ri qadam" sifatida baholanmoqda.
Manba: One.uz
