Xvicha Kvaratsxeliya "Manchester Yunayted"ga o‘tishi mumkin

Fransiyaning "PSJ" klubi safida o‘ynayotgan iqtidorli futbolchi Xvicha Kvaratsxeliya faoliyatini Angliya Premer ligasida davom ettirishi mumkin. Bu haqda Zamin.uz xabar berdi.

Xorijiy matbuotning xabarlariga ko‘ra, "Manchester Yunayted" klubi gruziyalik futbolchini o‘z tarkibiga qo‘shishni jiddiy o‘ylamoqda. "Qizil iblislar"ning murabbiylar shtabi Kvaratsxeliya va Bruno Fernandeshning birgalikdagi o‘yinlari jamoaga chempionlik uchun kurashda katta yordam berishiga ishonmoqda.

Ma’lumotlarga ko‘ra, 25 yoshli futbolchi 2025 yilda "Napoli"dan "PSJ"ga 80 million yevro evaziga o‘tgan edi va uning Parij klubi bilan tuzgan shartnomasi 2029 yil 30 iyunga qadar amal qiladi. Joriy mavsumda Xvicha parijliklar safida barcha musobaqalarda 34 ta o‘yinda qatnashib, 9 ta gol urishga va 6 ta golli uzatmani amalga oshirishga muvaffaq bo‘ldi.

"Transfermarkt" portali uning transfer qiymatini 90 million yevroga baholamoqda. Agar transfer amalga oshsa, bu yozgi transfer oynasining eng diqqatga sazovor voqealaridan biri bo‘lishi kutilmoqda.