Xavi Barselonaga qaytmaydi va Marokashga borishi mumkin
“Barselona” jamoasining sobiq bosh murabbiyi Xavi kataloniyaliklar safidagi faoliyatini yakunladi. Bu haqda Zamin.uz xabar berdi.
U “La Vanguardia” nashriga bergan intervyusida klubga qaytish haqidagi savollarga aniq javob berdi. Xavining so‘zlariga ko‘ra, murabbiy sifatida “Barselona”dagi davri to‘liq tugagan va u bu jamoaga yana qaytmaydi.
Xavi 2021 yildan 2024 yilgacha “Barselona”ni boshqargan. Uning qo‘l ostida jamoa murakkab davrlarni boshdan kechirgan bo‘lsa-da, Ispaniya chempionati va Ispaniya Superkubogida g‘alaba qozondi.
Hozirda ishsiz bo‘lgan murabbiyning kelajagi haqida turli mish-mishlar tarqalmoqda. Xususan, uning Marokash milliy terma jamoasini boshqarishi mumkinligi haqida xabarlar futbol ixlosmandlari orasida faol muhokama qilinmoqda.
Agar Xavi Marokash taklifini qabul qilsa, bu uning faoliyatida yangi bosqich bo‘ladi. Klub futbolidagi tajribadan so‘ng terma jamoa darajasida ishlash unga yangi chaqiriq bo‘ladi.
Hozircha u “Barselona” eshiklarini yopgan bo‘lsa-da, muxlislar uning keyingi qadamlarini qiziqish bilan kutmoqda. Manba: One.uz
