Mourinyu va Gonsales o‘rtasidagi janjal Benfika Portu durangiga sabab bo‘ldi
Portugaliya chempionatida "Benfika" va "Portu" jamoalari o‘rtasidagi “O Klassiko” deb ataluvchi markaziy o‘yin katta qiziqish va keskin bahslarga boy bo‘ldi. Bu haqda Zamin.uz xabar berdi.
Uchrashuv 2:2 hisobida durang bilan yakunlandi, biroq o‘yinning so‘nggi daqiqalaridagi voqealar asosiy mavzuga aylandi. “Benfika” bosh murabbiyi Joze Mourinyu hakam tomonidan maydondan chetlatildi.
O‘yinning 89-daqiqasida Leandro Barreiro hisobni tenglashtirgach, maydon chetida katta janjal yuz berdi. Mourinyu “Portu” murabbiylar shtabi a’zosi Luchu Gonsales bilan to‘qnashdi.
Tajribali murabbiyning so‘zlariga ko‘ra, Gonsales uni 50 martadan ortiq sotqinlikda ayblagan. Mourinyu esa bu ayblovlarni qat’iyan rad etdi va o‘zining professional faoliyati davomida barcha klublarga bor kuchini berganini ta’kidladi.
Hakam Mourinyuni to‘pni raqib zaxira o‘rindig‘iga qaratib tepganligi sababli maydondan chetlatganini bildirdi. Biroq portugaliyalik mutaxassis bu iddaoni inkor qilib, to‘pni tribunadagi muxlislarga sovg‘a qilmoqchi bo‘lganini aytdi.
U shuningdek, to‘rtinchi hakamning ishini qattiq tanqid qildi. Uchrashuv natijasiga ko‘ra, “Portu” 66 ochko bilan turnir jadvalida yetakchilikni saqlab qoldi.
“Benfika” esa peshqadamdan yetti ochko orqada turibdi. Mourinyu chempionlik poygasi hali tugamagani va oldinda muhim o‘yinlar borligini qo‘shimcha qildi.
Manba: goal.com
