Samvel Babayan Andijon klubidagi bosh murabbiylik lavozimidan istefoga chiqdi
O‘zbekiston Superligasining yettinchi turi doirasida Andijon jamoasi o‘z maydonida Olmaliqning OKMK klubini qabul qildi. Bu haqda Zamin.uz xabar berdi.
Keskin kurashlarga boy bo‘lgan bahs mehmonlarning 2:1 hisobidagi g‘alabasi bilan yakunlandi. Ushbu mag‘lubiyatdan so‘ng Andijon bosh murabbiyi Samvel Babayan matbuot anjumanida iste’fo berishini va klubni tark etishini rasman e’lon qildi.
Samvel Babayan uchrashuvdan keyingi fikrlarini bildirar ekan, natija uchun muxlislardan uzr so‘radi. U o‘z faoliyatida ilk bor shunday vaziyatga tushayotganini va bu holat aynan Andijon jamoasida yuz berganidan afsusdaligini ta’kidladi.
Murabbiyning so‘zlariga ko‘ra, o‘yinni yomon boshlashmagan, bir qator imkoniyatlardan foydalanishga harakat qilishgan, ammo himoyadagi xatolar qimmatga tushgan. Mutaxassis o‘z nutqida klub rahbariyati va viloyat hokimligi tomonidan yaratilgan sharoitlarni alohida e’tirof etdi.
One.uz sayti xabar berishicha, Babayan jamoani shakllantirishda barcha imkoniyatlar ishga solinganini, ammo keyingi turlardagi ketma-ket muvaffaqiyatsizliklar jamoa ruhiyatiga salbiy ta’sir ko‘rsatganini qayd etdi. Ayniqsa, FIFA kunlaridan keyingi o‘yinlarda yuzaga kelgan tushunarsiz mag‘lubiyatlar murabbiylar shtabining iste’foga chiqishiga asosiy sabab bo‘ldi.
Babayan o‘z qarorini erkakcha qadam deb atab, klub boshqaruvini boshqa mutaxassisga topshirish vaqti kelganini aytdi. U Andijon jamoasi tarixidagi eng yaxshi natijani qayd etish niyatida kelganini, biroq hozirgi vaziyatda boshqa harakat qila olmasligini qo‘shimcha qildi.
Murabbiy o‘zi va shtabi jamoa uchun kechayu kunduz mehnat qilganini, ammo natija kutilganidek bo‘lmaganini ta’kidlab, barcha uchun muvaffaqiyat tiladi.
