Chempionlar ligasi hakami mutaxassislar tomonidan qattiq tanqid qilindi

Ijtimoiy tarmoqlarda futbol hakamlari faoliyatini tahlil qiluvchi Archivo VAR kanali Bavariya va Real Madrid o‘rtasida bo‘lib o‘tgan Chempionlar ligasi uchrashuvi hakamiga nisbatan qattiq tanqid bildirdi. Bu haqda Zamin.uz xabar berdi.

Ushbu bahsni boshqargan sloveniyalik referi Slavko Vinchichning ishi mutaxassislar tomonidan juda past baholandi. Tahlilchilar hakamning faoliyatiga o‘n ballik tizimdan atigi bir ball qo‘yishdi va uning qarorlarini halokatli deb atashdi.

Manbaga ko‘ra, Vinchichning so‘nggi yillardagi eng omadsiz o‘yinlaridan biri aynan shu uchrashuv bo‘ldi. Mutaxassislar hakamni muhim epizodlarni e’tiborsiz qoldirgani va maydon nazoratini yo‘qotgani bilan ayblamoqda.

Xususan, sloveniyalik hakam ikki marta jiddiy xatoga yo‘l qo‘yganligi va bu xatolar bevosita ikki ta golga sabab bo‘lgani ta’kidlandi. Archivo VAR tahlilida Vinchich ancha vaqtdan beri muhim o‘yinlarni uddalay olmayotgani va barcha muhim vaziyatlarni o‘tkazib yuborgani qayd etilgan.

Shuningdek, Eduardo Kamavingaga nisbatan qabul qilingan qaror ham katta bahslarga sabab bo‘ldi. Hakam futbolchi to‘pni bir necha soniya ushlab turgani uchun unga ikkinchi sariq kartochka ko‘rsatib, maydondan chetlatgan.

Tahlilchilarning fikricha, bunday harakat Chempionlar ligasi standartlariga mos kelmaydi va odatda bunday holatlar uchun o‘yinchi maydonni tark etmaydi. Bundan tashqari, hakam aniq qoidabuzarliklarni ko‘rmagan holda, juda kichik to‘qnashuvlar uchun follar belgilagani tanqid qilindi.

Bu holat o‘yinning umumiy borishiga salbiy ta’sir ko‘rsatganligi aytilmoqda. Eslatib o‘tamiz, Chempionlar ligasining chorak final bosqichida Bavariya jamoasi Real Madridni ikki o‘yin yig‘indisi bo‘yicha olti to‘rt hisobda mag‘lub etdi va turnirning yarim finaliga yo‘llanma oldi.

Manba: Archivo VAR