Fabio Kannavaro O‘zbekiston milliy jamoasini boshqarish haqida sozladi

Mashhur futbol mutaxassisi Fabio Kannavaro Prime Video Sport nashriga bergan intervyusida O‘zbekiston milliy terma jamoasini boshqarish va kelajakdagi maqsadlar haqida batafsil so‘zladi. Bu haqda Zamin.uz xabar berdi.

Murabbiyning ta’kidlashicha, u O‘zbekistondan tushgan taklifni hech qanday ikkilanishsiz va tezda qabul qilgan. Bu qarorni qabul qilishda moliyaviy masalalar yoki boshqa shartlar hal qiluvchi rol o‘ynamaganini, asosiy sabab futbolga bo‘lgan ishtiyoq va yangi professional chaqiruv ekanini bildirdi.

Kannavaro ushbu imkoniyatni taqdirning go‘zal sovg‘asi deb atadi. U o‘zining futbolchi davrida Jahon chempionatida ishtirok etganini eslatib, endilikda murabbiy sifatida mundialga yo‘l ochish alohida hissiyot va katta mas’uliyat ekanini ta’kidladi.

Hozirgi kunda uning asosiy e’tibori futbolchilarni nafaqat taktik jihatdan, balki ruhiy tomondan ham tayyorlashga qaratilgan. Zero, jamoaning ko‘p a’zolari uchun bu ilk bor jahon sahnasiga chiqish bo‘lib, bunday vaziyatda psixologik bosim juda yuqori bo‘ladi.

Terma jamoa haqida gapirganida, Kannavaro ochiq va real baho berdi. Uning fikricha, O‘zbekiston jamoasi yulduz futbolchilardan iborat emas, lekin ular g‘oyat mehnatkash va intizomli.

Murabbiy jamoaning eng kuchli tomoni sifatida birdamlik va taslim bo‘lmaslik xarakterini ko‘rsatdi. Uning tushunchasiga ko‘ra, maydonda har bir raqibga qarshi oxirigacha kurashish va maksimal harakat qilish asosiy maqsad hisoblanadi.

Kannavaro futbolchilardan bosimdan qo‘rqmaslikni va yo‘qotadigan hech narsasi yo‘q ruhida o‘ynashlarini kutmoqda. U jamoaning kurashchanligi har qanday kuchli raqibga qiyinchilik tug‘dirishi mumkinligiga ishondi.

Hatto kichik natijalar ham katta yutuq sifatida baholanishi kerakligini aytdi. Shuningdek, Jahon chempionatidan so‘ng Osiyo kubogida ham jamoaning o‘z kuchini namoyish etib, yanada rivojlanishiga umid qilayotganini bildirdi.

Manba: Prime Video Sport