Chelsi yulduzlari Chempionlar ligasiga yo‘llanma olmasa jamoani tark etadi
Chelsi muxlislari orasida jamoaning beqaror o‘yinlari va natijalardagi pasayish sababli katta xavotirlar ortib bormoqda. Bu haqda Zamin.uz xabar berdi.
Kelgusi yozgi transfer oynasida klubning bir qator asosiy futbolchilari jamoani tark etishi mumkinligi haqida gap-so‘zlar yuribdi. Shu bilan birga, Angliyaning yetakchi klublari ham aristokratlar tarkibidagi eng kuchli o‘yinchilarga allaqachon ko‘z tikkan.
Ma’lumotlarga ko‘ra, agar Chelsi Evropa Chempionlar ligasiga yo‘llanmani qo‘lga kirita olmasa, jamoani bir necha muhim futbolchilar tark etishi ehtimoli juda yuqori. Bunday holatda Enso Fernandes, Moyzes Kaysedo va Mark Kukurelya kabi yetakchi ijrochilar klubni tark etishlari mumkin.
Shuningdek, ushbu ro‘yxatga boshqa futbolchilar ham qo‘shilishi ehtimoli bor. Jurnalist Saymon Fillipsning xabariga ko‘ra, hatto Koul Palmer ham jamoada yuz berayotgan vaziyatni diqqat bilan kuzatmoqda va ketish imkoniyatlarini o‘ylab ko‘rmoqda.
Biroq u Chelsi rahbariyati uning transfer qiymatini sun’iy ravishda oshirib yuborishi mumkinligidan xavotirda. Fillipsning ta’kidlashicha, Arsenal klubi Angliya terma jamoasi a’zosi Palmerga jiddiy qiziqish bildirgan.
Londonliklar uni Kay Xavers o‘rnini to‘ldira oladigan eng munosib nomzod sifatida ko‘rmoqda. Arsenal yozgi transfer oynasida tarkibda sezilarli o‘zgarishlar qilishni rejalashtirmoqda.
Martin Edegor, Kay Xavers, Itan Nvaneri va Mikel Merino kabi futbolchilarning kelajagi noaniq bo‘lib turgan bir paytda, klubga o‘yinni boshqaradigan superyulduz zarur. Aynan shu nuqtada Koul Palmer Arsenal uchun asosiy nishonga aylangan.
Jamoa uni yarimhujum chizig‘ida yetakchi figura sifatida ko‘rmoqda va uning kelishi bilan hujum uslubini yanada kuchaytirishni maqsad qilgan. Manba: One.uz
