Jurnalist Vinisiusni Real Madrid klubidan sotishni tavsiya qildi
El Chiringuito TV nashri jurnalisti Xuanfre Sans Real Madrid klubi vingeri Vinisius Juniorning jamoa ichidagi xulq-atvori yuzasidan tanqidiy fikr bildirdi. Bu haqda Zamin.uz xabar berdi.
Jurnalist braziliyalik futbolchini kiyimxona va jamoa doirasida ziddiyatlar keltirib chiqarishda ayblab, klub rahbariyatiga uni sotish masalasini ko‘rib chiqishni tavsiya qildi. Sansning ta’kidlashicha, Real Madrid uchun eng to‘g‘ri qaror futbolchi bilan xayrlashish bo‘lishi mumkin.
Uning so‘zlariga ko‘ra, Vinisius Barselona jamoasiga qarshi o‘yin oldidan kiyimxonada ichki kelishmovchiliklar yasagan va bu vaziyatni nazorat qilishda muammolar yuzaga kelgan. Jurnalist futbolchi o‘z imkoniyatlarini klub uchun to‘liq sarflab bo‘lganini va uning xulqiy muammolari jamoa ruhiga salbiy ta’sir ko‘rsatayotganini qayd etdi.
Xuanfre Sansning fikricha, klub uzoq vaqt davomida futbolchining yuqori mahoratiga tayanib, uning xulq-atvoridagi kamchiliklarini e’tiborsiz qoldirgan. Jamoada g‘alabalar ketma ketligi kuzatilganda bunday muammolar sezilmasligi mumkin, biroq natijalar pasayganda ichki ziddiyatlar ochiq holda namoyon bo‘ladi.
Shu sababli, muvaffaqiyatsizliklar davrida keskin va qat’iy qarorlar qabul qilish zarurligini ta’kidladi. Hozirgi kunda Real Madrid jamoasi maydonda ham murakkab vaziyatga tushib qolgan.
Yaqinda bo‘lib o‘tgan Alaves bilan uchrashuvda jamoa 2:1 hisobida g‘alaba qozongan bo‘lsa-da, Santyago Bernabeu stadionidagi muxlislar Vinisius va Mbappeni hushtaklar bilan kutib olishdi. O‘yin yakunida Vinisius g‘alaba golini urgan va goldan so‘ng klub emblemasini o‘pib, muxlislardan uzr so‘rash orqali vaziyatni yumshatishga harakat qildi.
Manba: One.uz
