«Arsenal» yigirma yillik tanaffusdan so‘ng Angliya chempioniga aylandi
Londonning Arsenal klubi muxlislari bugun Emirates stadioni atrofini haqiqiy bayram maydoniga aylantirishdi. Bu haqda Zamin.uz xabar berdi.
Manchester Siti jamoasining Bornmut bilan kechgan bahsda birga bir hisobida durang o‘ynashi Mikel Arteta shogirdlarining muddatidan avval Angliya Premer-ligasi g‘olibiga aylanishini ta’minladi. Bu haqda Goal nashri xabar bermoqda.
Mazkur natija London klubi uchun tarixiy ahamiyatga ega, chunki jamoa so‘nggi bor 2003-2004-yilgi mavsumda chempionlik shohsupasiga ko‘tarilgan edi. Oradan o‘tgan yigirma yillik tanaffusdan so‘ng qo‘lga kiritilgan ushbu g‘alaba muxlislar uchun unutilmas voqeaga aylandi.
Ijtimoiy tarmoqlarda tarqalgan videolarda minglab ishqibozlar qizil mash’alalar yoqib, bayroqlar bilan o‘z jamoasining muvaffaqiyatini nishonlayotgani aks etgan. Pep Gvardiola boshchiligidagi Manchester Siti safarda ochko yo‘qotishi bilan chempionlik poygasiga rasman nuqta qo‘yildi.
Uchrashuvda Eli Junior Krupi tomonidan kiritilgan golga Erling Xoland javob qaytargan bo‘lsa-da, bu natija amaldagi chempionlarning poygani davom ettirishi uchun yetarli bo‘lmadi. Shu tariqa, Arsenal ochkolar farqi evaziga raqiblari uchun yetib bo‘lmas darajaga ko‘tarildi.
Mikel Arteta o‘z jamoasi bilan uzoq yillik intizorlikka chek qo‘yib, klub tarixida yangi sahifa ochdi. Jamoaning barqaror o‘yini va mavsum davomidagi irodasi yakunda o‘z mevasini berdi.
Endilikda jamoa yakshanba kuni Kristal Pelasga qarshi bo‘lib o‘tadigan uchrashuvni ko‘tarinki ruhda va bayramona kayfiyatda o‘tkazadi. Shuningdek, Londonliklarni oldinda yana bir mas’uliyatli bahs kutib turibdi.
Jamoa 30-may kuni Budapesht shahrida PSJ klubiga qarshi Chempionlar ligasining final uchrashuvida maydonga tushadi. Muxlislar o‘z suyukli jamoalaridan ushbu nufuzli musobaqada ham g‘alaba kutishmoqda.
