«PSJ» penaltilar seriyasida «Arsenal»ni mag‘lub etib chempion bo‘ldi
Vengriya poytaxti Budapesht shahri mezbonlik qilgan Chempionlar ligasining hal qiluvchi final uchrashuvi futbol muxlislari uchun unutilmas voqealarga boy bo‘ldi. Bu haqda Zamin.uz xabar berdi.
Unda Angliyaning Arsenal hamda Fransiyaning Pari Sen-Jermen jamoalari o‘zaro bahs olib bordi. O‘yinning asosiy va qo‘shimcha vaqtlari 1:1 hisobidagi durang bilan yakunlandi.
G‘olib nomi esa asabiy ruhda o‘tgan penaltilar seriyasida aniqlandi. Hal qiluvchi pallada londonliklar himoyachisi Gabriel xatoga yo‘l qo‘ydi va bu parijliklarga ketma-ket ikkinchi bor Yevropaning eng nufuzli klublararo sovrinini qo‘lga kiritish imkonini berdi.
Mazkur uchrashuv tafsilotlari haqida Goal.com nashri xabar bermoqda. O‘yin londonliklar uchun kutilganidan ham muvaffaqiyatli boshlandi.
Uchrashuvning 6-daqiqasidayoq Kai Haverts hisobni ochishga muvaffaq bo‘ldi. Raqib himoyachisi Markinyosning qo‘pol xatosidan unumli foydalangan nemis hujumchisi to‘pni darvozaning yuqori burchagiga aniq joylab qo‘ydi.
Shundan so‘ng Arsenal jamoasi o‘zining an’anaviy himoyaviy taktikasi asosida harakat qila boshladi. Ayniqsa, markaziy himoyachi Gabriel birinchi bo‘lim davomida raqib hujumchilarining, jumladan Xvicha Kvaratsxeliyaning xavfli hujumlarini bartaraf etishda katta jonbozlik ko‘rsatdi.
Biroq ikkinchi bo‘limning o‘rtalariga kelib vaziyat butunlay o‘zgardi. O‘yinning 60-daqiqasida Kristian Mosquera o‘z jarima maydonchasi ichida Kvaratsxeliyaga nisbatan qo‘pollik ishlatgani uchun hakam penalti belgiladi.
Usmon Dembele imkoniyatni qo‘ldan boy bermay, muvozanatni tiklashga erishdi. Bahsning qolgan qismida darvozabon David Raya va darvoza ustuni Arsenalni bir necha bor muqarrar goldan qutqarib qoldi.
Natijada g‘olib nomi qo‘shimcha bo‘limlarda ham aniqlanmay, jamoalar penaltilar seriyasiga yo‘l oldilar. Penaltilar seriyasi ham o‘ta hayajonli va keskin o‘tdi.
Dastlab Eberechi Eze xatoga yo‘l qo‘ygan bo‘lsa, keyinroq David Raya Nuno Mendesning zarbasini qaytarib, jamoasining umidlarini saqlab qoldi. Ammo to‘satdan o‘lim deb ataluvchi bosqichda Pari Sen-Jermen futbolchilari aniq harakat qilishdi.
Gabrielning zarbasi esa darvoza to‘sini ustidan o‘tib ketdi. Shu tariqa, o‘yin davomida ishonchli harakat qilgan braziliyalik himoyachi yakunda jamoasining mag‘lubiyatiga sababchi bo‘lib qoldi va parijliklar g‘alabani tantana qilishdi.
