Erling Xolandning sust o‘yiniga sog‘lig‘idagi muammolar sabab bo‘ldi
Jahon chempionatining chorak final bosqichida Norvegiya terma jamoasining Angliyaga imkoniyatni boy berib, musobaqa bilan xayrlashishi futbol jamoatchiligi uchun kutilmagan voqea bo‘ldi. Bu haqda Zamin.uz xabar berdi.
Ayniqsa, jamoaning asosiy hujumchisi Erling Xolandning o‘z imkoniyatlaridan ancha past darajada o‘yin ko‘rsatgani va qo‘shimcha bo‘limlarda zaxiraga olingani turli muhokamalarga sabab bo‘ldi. Goal.com nashri tarqatgan xabarga ko‘ra, hujumchining maydondagi sust harakatlariga uning sog‘lig‘i bilan bog‘liq jiddiy muammolar asosiy sabab bo‘lgan.
Manchester Siti jamoasi yulduzi Mayamidagi uchrashuvda o‘zining odatiy ustunligini namoyish eta olmadi. O‘yindan avval muxlislar va mutaxassislar Garri Keyn hamda Erling Xoland o‘rtasidagi murosasiz to‘qnashuvni intizorlik bilan kutishgan edi, biroq norvegiyalik forvard maydonda deyarli ko‘zga tashlanmadi.
Ma’lum bo‘lishicha, Norvegiya terma jamoasi qarorgohida tarqalgan virusli kasallik Xolandning jismoniy holatiga salbiy ta’sir ko‘rsatgan. Shu sababli u o‘yin davomida o‘ziga xos tezlik va harakatchanlikni ko‘rsata olmadi.
Angliya Premer-ligasining sobiq hujumchisi Toni Kaskarino talkSPORT nashriga bergan intervyusida futbolchining holati haqidagi ma’lumotlarni ochiqladi. Uning so‘zlariga ko‘ra, tanaffus vaqtida hujumchining o‘zini yomon his qilayotgani haqida xabarlar kelgan.
Kaskarinoning ta’kidlashicha, Erling Xoland xuddi Angliya terma jamoasi a’zosi Deklan Rays kabi kasallikdan aziyat chekkan va bu uning quvvatini sezilarli darajada kamaytirib yuborgan. Statistik ma’lumotlar ham Xolandning o‘yini qovushmaganini yaqqol tasdiqlaydi, u raqib himoyachilariga qarshi kurashlarda qiynaldi.
Norvegiya terma jamoasi bosh murabbiyi Stale Solbakken o‘yindan so‘ng o‘zining asosiy yulduzini zaxiraga olish qarorini izohlab o‘tdi. Murabbiyning aytishicha, Xoland jismoniy jihatdan butunlay toliqqan edi va uni hatto o‘n daqiqa avvalroq almashtirish zarur bo‘lgan.
Solbakken hujumchining turnir davomida bor kuchini sarflaganini hamda ikkinchi bo‘limda olgan jarohati holatni yanada og‘irlashtirganini bildirdi. Shunga qaramay, Erling Xoland ushbu chempionatni yuqori darajada o‘tkazdi deb hisoblash mumkin.
U beshta uchrashuvda yettita gol urib, jamoasining chorak finalga qadar yetib kelishiga ulkan hissa qo‘shdi.
