«Chelsi» hujumchisi Alejandro Garnacho «Aston Villa»ga o‘tishga yaqin turibdi
Londonning Chelsi klubi hujumchisi Alejandro Garnacho jamoani tark etishga va faoliyatini Birmingemning Aston Villa jamoasida davom ettirishga yaqin turibdi. Bu haqda One.uz xabar beradi.
Argentinalik iqtidor egasi Stamford Bridge stadionidagi omadsiz mavsumdan so‘ng, yangi klub safiga o‘tishga rozilik bergan. Mazkur kelishuv Angliya Premer-ligasidagi navbatdagi shov-shuvli transferlardan biriga aylanishi kutilmoqda.
Goal.com nashri bergan ma’lumotlarga ko‘ra, tomonlar o‘zaro kelishuvning so‘nggi bosqichida turibdi. The Athletic nashri xabariga tayansa, Aston Villa va Chelsi futbolchining transferi bo‘yicha yakuniy to‘xtamga kelgan.
Kelishuv shartlariga ko‘ra, 22 yoshli vinger dastlab bir mavsum davomida ijara asosida to‘p suradi. Shartnomada ma’lum shartlar bajarilgan taqdirda, Birmingem klubi futbolchini to‘liq sotib olish majburiyatini ham o‘z zimmasiga olgan.
Bu Unai Emery uchun katta g‘alaba hisoblanadi, chunki ispaniyalik mutaxassis o‘tgan yili Garnacho Manchester Yunayteddan ketayotgan vaqtda ham uni o‘z jamoasida ko‘rishni istagan edi. Emeryning rejasi va tibbiy ko‘rik Unai Emery Alejandro Garnacho ishtirokidagi yuqori tezlik va texnik mahorat uning taktik chizmalariga to‘liq mos tushishiga ishonmoqda.
Ma’lum qilinishicha, futbolchi allaqachon Birmingem shahrida tibbiy ko‘rikdan o‘tgan va transfer doimiyga aylangan taqdirda kuchga kiradigan to‘rt yillik shartnoma shartlarini qabul qilgan. Bu qadam Aston Villa uchun yangi mavsumda Chempionlar ligasi va ichki birinchilikdagi raqobat oldidan hujum chizig‘ini kuchaytirishda muhim ahamiyatga ega.
Chelsi bosh murabbiyi Xabi Alonso ham ushbu transferga qarshilik ko‘rsatmadi. Garnacho jamoaning mavsumoldi mashg‘ulotlarida ko‘rinish bermadi, chunki Alonso unga transfer masalalarini hal qilish uchun ruxsat bergan edi.
Atletiko Madrid akademiyasi tarbiyalanuvchisi hisoblangan futbolchi Londonda o‘z o‘rnini topa olmadi va asosiy tarkibning doimiy a’zosiga aylana olmadi. Garnacho o‘tgan yili Manchester Yunayteddan 40 million funt sterling evaziga sotib olingan edi, biroq u o‘ziga bildirilgan ishonchni to‘liq oqlashga qiynaldi.
O‘tgan mavsumda u barcha musobaqalarda 22 ta o‘yinda maydonga tushib, 8 ta gol urishga muvaffaq bo‘ldi. Shunga qaramay, u jamoaning o‘yin uslubiga to‘liq moslasha olmadi.
Uning ketishi Chelsi tarkibidagi keng ko‘lamli islohotlarning bir qismidir. Avvalroq Mark Kukurelya Real Madridga, Andrey Santos esa Manchester Yunaytedga yo‘l olgan edi.
Transfer bozoridagi o‘zaro almashinuv Qizig‘i shundagi, Garnacho transferi ikki klub o‘rtasidagi o‘ziga xos almashinuvning bir qismi sifatida ko‘rilmoqda. Yaqinda Chelsi Aston Villadan Morgan Rojersni 117 million funt sterling evaziga sotib olib, klub rekordini yangilagan edi.
Garnachoning Aston Villaga kelishi esa aynan Rojers ketganidan keyin hujumda paydo bo‘lgan bo‘shliqni to‘ldirishga xizmat qiladi. Aston Villa o‘tgan mavsumda Yevropa ligasida g‘alaba qozonib, o‘z tarixida yangi sahifa ochgan edi.
Endilikda jamoa Chempionlar ligasida munosib ishtirok etishni maqsad qilgan. Garnachodan tashqari, klub allaqachon Freyburg jamoasidan Yoxan Manzambi transferini ham e’lon qildi.
Bu kabi faollik Birmingem klubining kelgusi mavsumda yuksak cho‘qqilarni ko‘zlayotganidan dalolat beradi.
