«Al-Nasr» klubi katta miqdordagi qarz tufayli inqirozga yuz tutdi
Krishtianu Ronaldu kabi dunyo yulduzlarini o‘z safiga qo‘shib olgan Saudiya Arabistonining Al-Nasr klubi ayni paytda jiddiy moliyaviy inqiroz yoqasida turibdi. Bu haqda One.uz xabar beradi.
So‘nggi ma’lumotlarga ko‘ra, klubning umumiy qarzdorligi 800 million riyoldan, ya’ni taxminan 213 million AQSH dollaridan oshib ketgan. Mazkur holat jamoaning yozgi transfer bozoridagi faolligini butunlay cheklab qo‘ydi va rahbariyatni shoshilinch choralar ko‘rishga majbur qilmoqda.
Hozirda klubni qutqarish uchun boshqaruv vakolatlarini cheklashdan tortib, jamoa ulushlarini xususiy investorlarga sotishgacha bo‘lgan bir necha variantlar ko‘rib chiqilmoqda. Qarzning kelib chiqish sabablari Ar-Riyodiya nashri tarqatgan xabarlarga ko‘ra, Al-Nasr klubining moliyaviy majburiyatlari o‘tgan mavsum davomida qabul qilingan noto‘g‘ri iqtisodiy qarorlar va qimmatbaho transferlar tufayli keskin ortib ketgan.
Garchi bu raqamlar rasmiy auditorlik hisobotlarida hali to‘liq tasdiqlanmagan bo‘lsa-da, klubning yangi futbolchilarni ro‘yxatdan o‘tkazishda duch kelayotgan qiyinchiliklari vaziyat naqadar murakkab ekanini tasdiqlaydi. Hozirgi tartibga ko‘ra, jamoa faqat o‘zining mustaqil tijoriy daromadlari hisobidan mablag‘ to‘play olsagina, yangi shartnomalarni imzolashi mumkin.
Moliyaviy cheklovlar tufayli klub hatto Ispaniyaning Malorka jamoasi yarim himoyachisi Samu Koshta bilan kelishuvga erishgan bo‘lsa-da, ushbu transferni oxiriga yetkaza olmadi. Transfermarkt ma’lumotlari ham klubning oxirgi ikki yildagi xarajatlari daromadlaridan bir necha barobar ko‘p ekanini ko‘rsatmoqda.
Xususan, so‘nggi ikki mavsumda yangi o‘yinchilar uchun 250 million yevrodan ortiq mablag‘ sarflangan bo‘lsa, futbolchilar sotuvidan tushgan foyda atigi 34 million yevro atrofida bo‘lgan. Natijada sof zarar miqdori 216 million yevrodan oshib ketgan.
Inqirozni bartaraf etish rejalari Al-Nasr aksiyalarining 75 foiziga egalik qiluvchi Saudiya Arabistoni Davlat investitsiya jamg‘armasi yuzaga kelgan vaziyatni o‘nglash uchun uchta asosiy yo‘nalishni belgilab oldi. Birinchi navbatda, klubning amaldagi ijroiya rahbariyati vakolatlari cheklanishi kutilmoqda.
Bu chora asosan asossiz xarajatlarning oldini olish va yangi shartnomalar tuzish jarayonini qattiq nazorat ostiga olishga qaratilgan. Ikkinchi chora sifatida maxsus konsalting kompaniyalari jalb etiladi.
Ushbu mutaxassislar klubning daromad manbalarini ko‘paytirish va mavjud qarzlarni uzish bo‘yicha aniq strategik reja ishlab chiqishlari lozim. Eng muhim va keskin o‘zgarish esa klubni qisman xususiylashtirish bo‘lishi mumkin.
Ma’lum qilinishicha, Davlat investitsiya jamg‘armasi klub ulushlarini sotib olishga tayyor bo‘lgan ikki yirik investorning taklifini ko‘rib chiqmoqda. Bu choralar Krishtianu Ronaldu kabi yuqori maosh oluvchi yulduzlarning shartnomaviy majburiyatlarini bajarish va klub barqarorligini ta’minlash uchun zarur deb hisoblanmoqda.
