Britaniya nashri o'zbek boks maktabining muvaffaqiyat sirlarini tahlil qildi
O‘zbekiston milliy terma jamoasining jahon boks arenalarida ko‘rsatayotgan mislsiz natijalari xalqaro sport nashrlari va yetakchi mutaxassislarning diqqat markazida turibdi. Bu haqda One.uz xabar beradi.
Buyuk Britaniyaning nufuzli Boxing Media nashri o‘zbek boks maktabining fenomenal yutuqlarini maxsus tahlil qilib chiqdi. Tahlilchilarning ta’kidlashicha, ringdagi ketma-ket g‘alabalar tasodif emas, balki mukammal ishlangan oyoq harakati texnikasi va o‘ziga xos harakatchanlik strategiyasiga asoslangan tizimli mehnat mahsulidir.
O‘zbekcha uslubning o‘ziga xos jihatlari Britaniya nashri o‘zbek boksidagi mashg‘ulotlar tizimining o‘ziga xos jihatlariga alohida to‘xtalib o‘tdi. Mutaxassislar fikriga ko‘ra, O‘zbekiston boks maktabida oyoq harakatiga, ya’ni boks tili bilan aytganda futvorkka alohida e’tibor qaratiladi.
Sportchilar yengil qadam tashlash, tana muvozanatini har qanday holatda saqlash va istalgan burchakdan chaqqonlik bilan hujumga o‘tishga o‘rgatiladi. Bokschilar mashg‘ulotlar davomida oldinga va orqaga tez siljish, keskin burilishlar hamda yon tomonga mayda qadamlar tashlash ustida tinimsiz ishlaydi.
Shu orqali ular raqibga kutilmaganda yaqinlashish, seriyali zarbalar yo‘llash va raqibning javob hujumi yetib kelguniga qadar xavfli hududdan chiqib ketishni mukammal o‘zlashtirgan. Ushbu uslub raqibni chalg‘itish va ringda ustunlikka erishishda asosiy qurol bo‘lib xizmat qilmoqda.
Ko‘plab kompleks mashqlar oyoq harakatini soya bilan jang, maxsus vositalar bilan ishlash yoki sparring sherigi bilan harakatlanish bilan uyg‘unlashtiradi. Bu esa sportchini bir joyda to‘xtab qolmasdan, doimiy harakatda turib aniq zarba berishga o‘rgatadi.
Aynan mana shu jihat o‘zbek bokschilarini boshqalardan ajratib turuvchi asosiy texnik ustunlik hisoblanadi. Jahon boksidagi yakkahokimlik davri Mutaxassislar e’tirofiga ko‘ra, O‘zbekiston milliy terma jamoasi 2016-yildan buyon jahon boksida yakkahokimlik qilib kelmoqda.
Rio-de-Janeyro mezbonlik qilgan Olimpiya o‘yinlarida o‘zbek charm qo‘lqop ustalari uchta oltin medalni qo‘lga kiritib, tarixda ilk bor umumjamoa hisobida birinchi o‘rinni egallagan edi. Bu natija o‘zbek boksining yangi davri boshlanganidan dalolat bergan.
Muvaffaqiyatlar silsilasi 2023-yil Toshkentda o‘tgan jahon chempionatida ham davom etdi. O‘z uyida kechgan mundialda milliy terma jamoa a’zolari beshta oltin medalga ega chiqib, o‘z ustunligini yana bir bor isbotladi.
Biroq eng yirik natija Parij-2024 Olimpiya o‘yinlarida qayd etildi. Erkaklar o‘rtasidagi yettita vazn toifasidan beshtasida oltin medalning qo‘lga kiritilishi dunyo boksi tarixidagi eng yuqori ko‘rsatkichlardan biri bo‘ldi.
Aynan oyoqda chaqqon harakatlanish, yuksak intizom va taktik savodxonlik O‘zbekistonni jahonning birinchi raqamli boks mamlakatiga aylantirgan bosh omillar sifatida baholanmoqda. Bugungi kunda xalqaro ekspertlar o‘zbek boks maktabini boshqa davlatlar uchun namuna sifatida ko‘rsatmoqda.
Ma’lumotlar One.uz nashri materiallari asosida tayyorlandi.
