«Sabah» Chempionlar ligasi yo‘llanmasini qo‘lga kiritib «Barselona»ga raqib bo‘ldi

Ozarbayjon futboli tarixida unutilmas voqea yuz berdi. Bu haqda One.uz xabar beradi.

Mamlakatning amaldagi chempioni Sabah klubi o‘z tarixida ilk bor qit’aning eng nufuzli musobaqasi hisoblangan UEFA Chempionlar ligasining asosiy bosqichida ishtirok etish huquqini qo‘lga kiritdi. Qur’a natijalariga ko‘ra, Boku jamoasi Yevropaning eng nomdor klublari bilan to‘qnash keladigan bo‘ldi.

O‘zbekistonlik iqtidorli yarim himoyachi Umarali Rahmonaliyev uchun esa ushbu mavsum alohida ahamiyatga ega, chunki u o‘zi orzu qilgan Barselona jamoasiga qarshi maydonga tushish imkoniyatiga ega bo‘ldi. Sabah jamoasining nufuzli raqiblari UEFA tomonidan joriy etilgan yangi formatga binoan, Sabah jamoasi umumiy bosqich doirasida sakkizta kuchli raqib bilan kuch sinashadi.

Qur’a natijalariga ko‘ra, Ozarbayjon chempioni o‘z maydonida Ispaniyaning Barselona, Germaniyaning Borussiya Dortmund, Italiyaning Napoli hamda Chexiyaning Slaviya Praga jamoalarini qabul qiladi. Safar uchrashuvlarida esa Boku klubi Angliyaning Arsenal va Manchester Yunayted, Ispaniyaning Vilyarreal hamda Norvegiyaning Viking jamoalari mehmoni bo‘ladi.

Bunday kuchli raqiblar bilan o‘yinlar Ozarbayjon futboli uchun katta tajriba va sinov vazifasini o‘taydi. Uzoq masofali parvoz va yangi rekord Barselona klubining Bokuga tashrifi nafaqat sport nuqtayi nazaridan, balki logistika jihatidan ham musobaqa tarixida yangi rekord o‘rnatadi.

Kataloniya klubi Ozarbayjon poytaxtiga yetib kelish uchun bir tomonlama taxminan 4 172 kilometr masofani bosib o‘tishi kerak bo‘ladi. To‘g‘ridan to‘g‘ri parvoz vaqti qariyb 5 soat 25 daqiqani tashkil etadi.

Shu tariqa, Sabah va Barselona o‘rtasidagi uchrashuv joriy mavsumdagi eng uzoq safar masofasi sifatida rasman qayd etiladi. Bu holat futbolchilardan nafaqat yuqori jismoniy tayyorgarlikni, balki uzoq yo‘l charchog‘ini yengib o‘tishni ham talab etadi.

O‘zbekistonlik futbolchining muvaffaqiyat yo‘li Bunyodkor akademiyasi tarbiyalanuvchisi bo‘lgan 22 yoshli Umarali Rahmonaliyevning faoliyati so‘nggi yillarda jadal rivojlanmoqda. U 2025-yilning yanvar oyida Rossiyaning Rubin jamoasidan Sabah klubiga o‘tgan edi.

O‘zining ishonchli o‘yinlari bilan murabbiylar ishonchini qozongan yarim himoyachi jamoaning ajralmas bo‘lagiga aylandi. Rahmonaliyev Boku klubi bilan Ozarbayjon chempionligi va ikki bor mamlakat kubogini qo‘lga kiritdi.

O‘tgan mavsumda u 34 ta o‘yinda ishtirok etib, o‘z hisobiga oltita gol va ikkita samarali uzatmani yozdirib qo‘ydi. Umarali Rahmonaliyev jamoasining Chempionlar ligasi yo‘llanmasini qo‘lga kiritishida ham muhim rol o‘ynadi.

U saralash va pley-off bosqichlaridagi sakkizta bahsda maydonga tushib, bitta gol va bitta golli uzatmani amalga oshirdi. Endilikda o‘zbekistonlik futbolchi Yevropaning eng yirik stadionlarida jahon yulduzlariga qarshi o‘z mahoratini namoyish etish imkoniga ega.

One.uz nashri ma’lumotlariga ko‘ra, ushbu tarixiy natija Ozarbayjon futbolining xalqaro maydondagi nufuzini yanada oshirishga xizmat qiladi.