«Roma» va «Komo» A Seriyada muhim uch ochko oldi
Italiya A Seriyasining 9-turi uchrashuvlari drama va gollarga boy o‘tdi. Bu haqda One.uz xabar beradi.
Rimning «Olimpiko» stadionida «Kalyari»ni qabul qilgan «Roma» 6 ta to‘p kiritilgan o‘ta shiddatli bahsda 4:2 hisobida irodali g‘alabani qo‘lga kiritdi. Shuningdek, Sesk Fabregas boshqaruvidagi «Komo» jamoasi Turin safarida haqiqiy iroda ko‘rsatib, bahsning eng so‘nggi daqiqalarida «Torino» darvozasini ketma-ket ishg‘ol qildi va muhim uch ochkoni naqd qildi.
«Roma» – «Kalyari» (4:2): «Bo‘rilar»dan yorqin iroda Rimda kechgan bellashuv tomoshabinlarga haqiqiy futbol spektaklini taqdim etdi. Bahsning 10-daqiqasida M'Bala Nzola penaltini aniq amalga oshirib, sardiniyaliklarni oldinga olib chiqdi; biroq oradan 5 daqiqa o‘tib Emmanuel Lulli hisobni tenglashtirdi.
21-daqiqada yosh iste’dod Nikkolo Pizilli raqib darvozasini aniq nishonga olib, «bo‘rilar»ni hisobda oldinga olib chiqdi. 81-daqiqada Daniel Maldini hisobni 2:2 ko‘rinishiga keltirib, intrigani qaytardi; ammo zaxiradan maydonga tushgan Mora (85-daqiqa) va Doniell Malen (87-daqiqa) ikki daqiqa ichida ikkita gol urib, «Roma»ga 4:2 hisobidagi ishonchli g‘alabani keltirdi.
Ushbu muvaffaqiyatdan keyin «Roma» ochkolari sonini 21 taga yetkazib, chempionat jadvalida mustahkam 3-o‘ringa ko‘tarilib oldi. «Kalyari» esa 13 ochko bilan 9-pog‘onada qoldi.
«Torino» – «Komo» (1:3): Fabregas shogirdlaridan 9 daqiqa ichida 3 ta gol Turindagi bahs mehmonlarning aqlbovar qilmas kambeki bilan tarixga kirdi. Uchrashuvning 24-daqiqasida Che Adams turinliklarni hisobda oldinga olib chiqdi va mezbonlar o‘yinning asosiy qismi davomida hisobni ushlab turdi.
Hammasi o‘yin yakunlanishi arafasida o‘zgardi — 81-daqiqada Ramon hisobni tenglashtirdi. 87-daqiqada Niko Pas mehmonlarni oldinga olib chiqqan bo‘lsa, 90-daqiqada Martin Baturina yakuniy hisobni o‘rnatdi — 1:3.
Mazkur sensatsion kambek tufayli «Komo» 17 ochko bilan turnir jadvalida 5-o‘ringa ko‘tarilib oldi, ulardan mag‘lub bo‘lgan «Torino» esa 16 ochko bilan 6-pog‘onaga tushib ketdi. Manba: One.uz
