Avstraliya dunyodagi eng qurg‘oqchil qit’alardan biri hisoblanadi, ammo so‘nggi yillarda mamlakat fermerlari bug‘doy yetishtirishda katta yutuqlarga erishmoqda. Bu haqida Zamin.uz xabar berdi.
1980-yillardan beri Avstraliya bug‘doy eksportini ikki barobar oshirdi. Bu muvaffaqiyatning asosiy sabablari qatoriga yer strukturasini yaxshilash, iqlimga mos navlarni ishlab chiqish va suvdan samarali foydalanish imkonini beruvchi yangi texnologiyalar kiradi.
Masalan, G‘arbiy Avstraliyadagi fermer Kertis Libek 2023-yilda so‘nggi ellik yil ichidagi eng kam yomg‘ir yog‘gan mavsumda ham har gektardan bir tonna bug‘doy hosil oldi. Bu esa ilgari “falokat” deb baholangan qurg‘oq ob-havoda katta yutuq sifatida qabul qilinmoqda.
Avstraliya fermerlari tuproqni himoya qilish va unumdorligini oshirish maqsadida “no-till” usuli, ya’ni haydamasdan ekish, chuqur yumshatish, kompost, gips va gil qo‘llash kabi usullarni keng joriy etmoqda. Shu bilan birga, yangi urug‘ navlari, erta ekish va suvdan samarali foydalanishga qaratilgan ilmiy tadqiqotlar bug‘doy yetishtirishni sezilarli darajada yaxshiladi.
Mutaxassislar bu tajribalar boshqa qurg‘oqchil davlatlar uchun ham foydali bo‘lishi mumkinligini ta’kidlamoqda. Fermer Kertis Libekning so‘zlariga ko‘ra, “Kamroq yomg‘ir biz uchun muammo emas, balki imkoniyatdir.” Bu yondashuv qurg‘oqchilik sharoitida ham hosildorlikni oshirishga yo‘naltirilgan samarali yechim sifatida qaralmoqda.
