Pokiston J-10C samolyoti Hind Rafalesini urib tushirdi

2025-yil 7-may kuni Pokiston va Hindiston o‘rtasida katta havo jangi yuz berdi. Bu haqida Zamin.uz xabar berdi.

Ushbu jangda Pokiston Harbiy havo kuchlari Xitoyda ishlab chiqarilgan J-10C qiruvchi samolyotlari va PL-15 raketalari yordamida Hindistonning Fransiyada ishlab chiqarilgan zamonaviy Rafale samolyotini urib tushirdi. Bu voqea harbiy texnologiyalar va qurollar samaradorligi borasida keng muhokamalarga sabab bo‘ldi.

Jangda taxminan 110 ta harbiy samolyot qatnashdi. Pokistonning J-10C samolyotlari uzoq masofali PL-15 raketalari bilan aniq nishonga olish imkoniyatiga ega bo‘ldi.

Ekspertlarning fikricha, jangda texnik ustunlikdan ko‘ra, situatsion xabardorlik asosiy rol o‘ynadi. Pokiston jang maydonidagi havo, quruqlik va kosmik kuzatuv vositalarini yagona tarmoqqa birlashtirib, dushman harakatlarini oldindan aniqlashga muvaffaq bo‘ldi.

Hindiston razvedkasining xatosi jang natijasiga ta’sir ko‘rsatdi. Ular PL-15 raketasi maksimal masofasini noto‘g‘ri baholagan, aslida bu raketa 200 kilometrdan ortiq masofaga urib tushirishga qodir ekan.

Shuningdek, Pokiston "kill chain" tizimini samarali yo‘lga qo‘ydi. Bu tizimda Xitoy va Shvetsiya ishlab chiqargan kuzatuv vositalari birgalikda ishladi, uchuvchilar radarlarsiz ham aniq harakat qila oldi.

Rafale samolyotining yo‘qotilishi Hindiston harbiy strategiyasiga jiddiy zarba bo‘ldi. Biroq Hindiston tezda yangi taktikalar ishlab chiqdi va keyingi kunlarda Pokiston harbiy obyektlariga javob zarbalarini berdi.

Xususan, hind BrahMos raketalari yordamida bir nechta radar va aerodromlarga hujum qilindi. Xitoy uchun bu voqea strategik yutuq bo‘ldi.

J-10C va PL-15 qurollarining samaradorligi isbotlangach, boshqa davlatlar ham Xitoy harbiy texnikasiga qiziqish bildirishni boshladi. Masalan, Indoneziya Rafale samolyoti bo‘yicha buyurtmalarini qayta ko‘rib chiqmoqda.

Bu holat global harbiy bozorda Xitoy qurollarining o‘rnining oshishini ko‘rsatadi.