Superwood yog‘och metall darajasida mustahkamligi aniqlandi
Amerikalik InventWood kompaniyasi tomonidan ishlab chiqilgan Superwood nomli yangi turdagi yog‘och oddiy yog‘ochga nisbatan ancha mustahkamdir. Bu haqida Zamin.uz xabar berdi.
Laboratoriya sinovlari natijasida Superwood oddiy daraxt taxtasidan bir necha barobar kuchli ekanligi aniqlangan. Hatto laboratoriya sharoitida unga qarata o‘q uzilganda ham bu material o‘zining bardoshini saqlab qolgan.
Kompaniya asoschilaridan biri Aleks Lau yog‘ochdagi lignin polimerini kimyoviy usulda olib tashlash orqali materialning 80 foiz siqilishi va kuchli vodorod aloqalarining yuzaga kelishini tushuntiradi. Bu jarayon mahsulotni yupqa, mustahkam va uzoq muddat bardoshli qilishga yordam beradi.
Shu tariqa Superwood yog‘och metall darajasida kuchga ega bo‘ladi. Superwood ekologik jihatdan ham foydali hisoblanadi.
Qurilishda ko‘p ishlatiladigan beton va po‘lat karbon gazini ko‘p miqdorda chiqaradi, aksincha yog‘och karbonni o‘zida saqlab qoladi. Shu sababli Superwood atrof-muhit uchun zararli bo‘lmagan material sifatida e’tirof etiladi.
Superwood qurilish materiallari o‘rtasida kuch jihatidan raqobatlashmasa-da, u mustahkam tashqi qoplama, ichki bezak elementlari va harbiy maqsadlarda foydalanish uchun juda mos keladi. Hozirda kompaniya tol yog‘ochidan foydalanmoqda, kelajakda esa bambukdan ham foydalanishni rejalashtirmoqda.
Kompaniya vakili Aleks Lau Superwood yong‘inga va hasharotlarga qarshi sinovlardan muvaffaqiyatli o‘tganini ta’kidlaydi. Shu bilan birga, Britaniya olimlari ushbu mahsulotning nam va quruq iqlim sharoitlariga chidamliligini aniqlash uchun qo‘shimcha tadqiqotlar olib borilishini kutmoqda.
