O‘zbekiston Raqobatni muhofaza qilish qo‘mitasi “Uzum Market” MChJ XKning murojaati asosida “YandexGo UB” MChJga nisbatan raqobat qonunchiligi buzilishi alomatlari bo‘yicha ish qo‘zg‘atdi. Bu haqida Zamin.uz xabar berdi.
Tekshiruv jarayonida “Yandex Market” reklamasida “Uzum Market” brendi bilan chalg‘ituvchi belgilar mavjudligi aniqlangan. Xususan, reklamada aktrisaning binafsha rangli libosi, ilk kadrlar va uzum belgisi “Uzum Market” oldingi videolariga o‘xshashligi qayd etildi.
Bundan tashqari, bosh qahramonning “A, bu marketmi?!” degan savoli tomoshabinlarda “Uzum Market” haqidagi taassurotni kuchaytirgan, aktrisaning “yo‘q, bu boshqa market” degan javobi esa “Yandex Market” ustunligiga ishora qilgan. Qo‘mita ushbu holatni “Raqobat to‘g‘risida”gi qonunning 21-moddasi doirasida noto‘g‘ri taqqoslash deb baholadi.
Biroq “Uzum Market” tomonidan moddiy zarar yetkazilgani haqida aniq iqtisodiy dalillar taqdim etilmagani sababli, holat past iqtisodiy ta’sirga ega deb topildi va jarima qo‘yilmadi. Shunga qaramay, “YandexGo UB” kompaniyasiga reklama roligini ommaviy axborot vositalaridan bir oy ichida olib tashlash, shuningdek, 14-avgustga qadar Qo‘mitaga tegishli hujjatlarni taqdim etish majburiyati yuklandi.
Qarordan norozi tomon Apellyatsiya kengashi yoki sudga murojaat qilish huquqiga ega.
