Monterreyda robot-it hayvonlarga mehrni targ‘ib qilmoqda
Meksikaning shimolidagi Monterrey shahrida sun’iy intellektga ega noyob robot-it ko‘chalarda yurib, odamlarni hayvonlarga mehribon bo‘lishga chaqirmoqda. Bu haqida Zamin.uz xabar berdi.
Peopletalk xabariga ko‘ra, Valdog nomli ushbu robot hayvonlarga nisbatan shafqatsizlik muammosiga jamoatchilik e’tiborini qaratish maqsadida yaratilgan. Loyiha muallifi, Monterreylik federal senator Valdo Fernandes, robot uchun o‘z shaxsiy mablag‘idan to‘rt ming dollardan ortiq mablag‘ sarflagan.
Shuningdek, u sun’iy intellektli itga o‘z nomini bergan. Valdog masofadan boshqariladi va unga doimiy kuzatuvchi hamroh bo‘lishi talab etiladi.
Robot-it shahar ko‘chalarida nafaqat yurib, atrofdagi axlatlarni qayd etadi, balki qarovsiz yurgan boshqa itlarni ham ro‘yxatga oladi. Fernandesning so‘zlariga ko‘ra, Valdogning ish jadvali juda band: u maktablar, maydonlar va turli mahallalarga tashrif buyuradi, shuningdek, fuqarolar bilan ko‘plab suratga tushadi.
Mutaxassislar fikricha, bunday robot-itlar kelajakda tabiiy ofatlardan so‘ng qidiruv-qutqaruv ishlarida keng qo‘llanilishi mumkin. AQSh hukumati ham Meksika bilan chegara hududlarini nazorat qilish uchun shunga o‘xshash qurilmalar ustida ish olib bormoqda.
Bu texnologiyalar inson va hayvonlar hayotini yaxshilashda muhim o‘rin tutadi.
