Telegram 2025 yilda 20 million kanalni o‘chirdi

Telegram 2025 yil boshidan buyon 20,9 milliondan ortiq kanal va guruhni o‘chirib tashladi. Bu haqida Zamin.uz xabar berdi.

Kompaniya ma’lumotlariga ko‘ra, bu messenjer tarixidagi eng keng ko‘lamli tozalash jarayoni hisoblanadi. Ayniqsa, 27 iyul kuni 402 mingdan ortiq kanal va guruh yopilishi bilan yangi rekord o‘rnatildi.

Shuningdek, 3 iyul kuni ham yirik miqyosda bloklash ishlari amalga oshirilib, 314 ming kanal faoliyati to‘xtatildi. Rasmiy bayonotda aniq sabablar ko‘rsatilmagan bo‘lsa-da, odatda bunday qarorlar foydalanuvchi shikoyatlari, firibgarlik, tovlamachilik yoki shaxsiy ma’lumotlarni noqonuniy tarqatish kabi holatlar bilan bog‘liq bo‘ladi.

Telegram asoschisi Pavel Durovning so‘zlariga ko‘ra, kompaniya so‘nggi paytlarda platformani noqonuniy kontent va “doksing”dan himoya qilishga alohida e’tibor qaratmoqda. Shuningdek, messenjer foydalanuvchilar uchun yangi reyting tizimini joriy etmoqda.

Ushbu tizim har bir foydalanuvchiga o‘z hisobining darajasini ko‘rish imkonini beradi. Bu ko‘rsatkich kelajakda to‘lov xizmatlari yoki qo‘shimcha funksiyalardan foydalanish imkoniyatini taqdim etishi mumkinligi ta’kidlandi.

Telegramning ushbu yangilanishlari platformaning xavfsizligi va sifatini oshirishga qaratilgan.