Starlink 2026 yildan O‘zbekistonda ish boshlaydi
Ilon Maskga tegishli SpaceX kompaniyasining Starlink loyihasi O‘zbekistonda 2026 yildan boshlab faoliyat yurita boshlaydi. Bu haqida Zamin.uz xabar berdi.
Bu haqda Starlinkning rasmiy veb-saytida e’lon qilingan ma’lumotlarga ko‘ra, xizmatning ishga tushishi aniq 2026 yilga rejalashtirilgan. Shuningdek, 13 avgustdan boshlab Qozog‘istonda ham Starlink sun’iy yo‘ldosh internet xizmatlari rasmiy ravishda ishga tushdi.
Qozog‘iston Respublikasi Raqamli rivojlanish, innovatsiyalar va aerokosmik sanoat vazirligi ma’lumotlariga ko‘ra, bu xizmat orqali aholiga yuqori tezlikdagi va ishonchli internetga ulanish imkoniyati taqdim etiladi. Ushbu xizmat SpaceX kompaniyasining past orbitadagi sun’iy yo‘ldoshlari orqali amalga oshiriladi.
Starlink texnologiyasi, asosan, an’anaviy internet xizmatlaridan uzilgan yoki qiyin, cheklangan hududlarda istiqomat qiluvchilar uchun yangi imkoniyatlarni yaratadi. Masalan, qishloq joylari yoki uzoq hududlarda ham Starlink orqali barqaror internet ulanishi ta’minlanadi.
Bu xizmat ayniqsa shahardan tashqari hududlarda internetga kirishni osonlashtiradi. SpaceX tomonidan amalga oshirilayotgan ushbu innovatsion loyiha nafaqat O‘zbekiston, balki butun Markaziy Osiyo mintaqasida internetga bo‘lgan talab va ehtiyojlarni qondirishga yordam beradi.
Starlinkning O‘zbekistonda ishga tushishi mamlakatdagi raqamli rivojlanishga sezilarli ta’sir ko‘rsatishi kutilmoqda. Bu esa axborot kommunikatsiya texnologiyalari sohasida yangi imkoniyatlar eshigini ochadi.
