Xiaomi birinchi simsiz televizorini taqdim etdi
Xitoyning yetakchi texnologiya kompaniyasi Xiaomi o‘zining birinchi simsiz televizorini taqdim etdi. Bu haqida Zamin.uz xabar berdi.
Yangi qurilma Xiaomi Max 27 nomi bilan sotuvga chiqarilgan bo‘lib, zamonaviy texnologiyalar bilan jihozlangan. Televizor 27 dyuymli IPS matrisa asosida ishlab chiqilgan va Full HD tasvir sifatini ta’minlaydi.
Shuningdek, u 60 gigaherts chastotani qo‘llab-quvvatlaydi. Qurilma stendga o‘rnatilgan bo‘lib, balandlik va egilish burchagini o‘zgartirish imkoniyati mavjud.
Televizorni qulay tashish uchun uning ostiga g‘ildiraklar ham o‘rnatilgan. Xiaomi Max 27 ekranini landshaft yoki portret yo‘nalishida ishlatish mumkin.
Qurilmaning ichki xotirasi 128 gigabayt, tezkor xotirasi esa 16 gigabaytni tashkil etadi. U 9700 milliamper soat sig‘imli batareyadan quvvat oladi va uzluksiz 13 soat ishlash imkonini beradi.
Qurilmaning narxi taxminan 3999 yuan, ya’ni 6 million so‘m atrofida belgilangan. Mutaxassislar fikricha, Xiaomi Max 27 modeli kompaniyaning televizor bozoridagi o‘rnini mustahkamlashga yordam beradi hamda yangi texnologik bosqichni boshlab beradi.
Ushbu yangilik iste’molchilar uchun qulaylik va sifatli ko‘rish tajribasini taqdim etadi. Xiaomi kompaniyasi kelajakda bunday innovatsion mahsulotlarni yanada rivojlantirish niyatida ekanini bildirgan.
