2025 yildan boshlab davlat xizmatlari onlayn taqdim etiladi
Joriy yil 8 sentyabr kuni Prezident tomonidan imzolangan PF–157-sonli farmonga muvofiq, 2025 yil 1 noyabrdan boshlab Yagona interaktiv davlat xizmatlari portalida (MyGov.uz) fuqarolarga oid ma’lumotlar ularning shaxsiy kabineti orqali real vaqt rejimida taqdim etiladi. Bu haqida Zamin.uz xabar berdi.
Ushbu farmonga asosan, fuqarolarning shaxsiy ma’lumotlari rasmiy holatga keltiriladi va ularning qog‘oz shaklidagi hujjatlar bilan teng yuridik kuchga ega bo‘ladi. Endilikda davlat organlari va tashkilotlari MyGov portalidagi ma’lumotlar taqdim etilganda, qog‘oz ko‘rinishidagi nusxasini talab qila olmaydi.
Shuningdek, 2025 yil 1 noyabrdan boshlab bir qator qulayliklar joriy etiladi. Xususan, Davlat xizmatlari markazlariga murojaat qilgan pensionerlar, homilador ayollar va 3 yoshga to‘lmagan farzandi bilan kelgan fuqarolarga navbatsiz xizmat ko‘rsatish huquqi beriladi.
Bundan tashqari, jismoniy shaxslarni Yagona identifikatsiya tizimi OneID orqali ro‘yxatdan o‘tkazishda biometrik aniqlash usuli – Face ID texnologiyasi joriy etiladi. Yana bir muhim yangilik shundan iboratki, endilikda Davlat xizmatlari markazlari Yagona portal orqali taqdim etilayotgan barcha xizmatlar bo‘yicha aholi va tadbirkorlarga xizmat ko‘rsatish huquqiga ega bo‘ladi.
Bu esa xizmatlardan foydalanish jarayonini yanada tez, shaffof va qulay qilishni ta’minlaydi. Ushbu o‘zgarishlar davlat xizmatlarini yanada sifatli va samarali qilishga xizmat qiladi.
