Buyuk Britaniyada aqlli stetoskop sinovdan o‘tdi

Buyuk Britaniyada tibbiyot sohasida yangi texnologik yutuq amalga oshirildi. Bu haqida Zamin.uz xabar berdi.

Sun’iy intellekt asosida ishlovchi “aqlli” stetoskop ishlab chiqildi va muvaffaqiyatli sinovdan o‘tkazildi. Imperial College London universiteti hamda NHS Trust tibbiyot xizmati hamkorligida yaratilgan ushbu qurilma yurak faoliyatiga oid bir qator kasalliklarni faqat 15 soniya ichida aniqlay oladi.

Jumladan, yurak yetishmovchiligi, aritmiya, xususan atrial fibrillyatsiya hamda yurak klapanlari bilan bog‘liq muammolarni aniqlash imkoniyatiga ega. Ushbu yangi stetoskop an’anaviy qurilmalardan farqli o‘laroq, nafaqat yurak tovushlarini tinglash bilan cheklanmaydi, balki elektrokardiogramma funksiyasini ham bajaradi.

Qurilma yurak urishi, qon oqimi va yurakning umumiy faoliyatini tahlil qilib, olingan ma’lumotlarni sun’iy intellekt yordamida smartfonga yuboradi va tezkor tashxis qo‘yadi. 12 mingdan ortiq bemorda sinovdan o‘tkazilgan ushbu qurilmaning natijalari shifokorlar tomonidan yuqori baholandi.

Yurak yetishmovchiligini aniqlash aniqligi ikki barobar, atrial fibrillyatsiya aniqlash ko‘rsatkichi esa uch barobar oshgani qayd etildi. Shifokorlar bu texnologiya dastlab belgisiz kechadigan yurak kasalliklarini erta bosqichda aniqlashga yordam berishini ta’kidlashmoqda.

Bu esa hayot sifatini yaxshilash va og‘ir asoratlarning oldini olish uchun katta imkoniyat yaratadi.